Ulytaý oblysynda jol erejesin óreskel buzǵandarǵa 22 hattama toltyryldy
ASTANA. KAZINFORM — Ulytaý oblysy polıtsııa departamentiniń qyzmetkerleri áleýmettik jelilerge júrgizilgen monıtorıng barysynda Jáırem kentindegi meıramhanalardyń birinde ótken úılený toıyna baılanysty uıymdastyrylǵan avtokólikter kolonnasynyń jol qozǵalysy qaǵıdalaryn óreskel buzǵanyn anyqtady.
Polıtsııanyń málimetinshe, júrgizilgen tekserý barysynda avtokolonnany uıymdastyrǵan azamat anyqtalyp, oǵan qatysty Qazaqstan Respýblıkasynyń ákimshilik quqyq buzýshylyq týraly kodeksiniń usaq buzaqylyqqa qatysty baby boıynsha ákimshilik hattama toltyryldy.
Sonymen qatar polıtsııa qyzmetkerleri júrgizgen jedel is-sharalardyń nátıjesinde jol qozǵalysy qaǵıdalaryn óreskel buzǵan segiz avtokólik júrgizýshisi anyqtalyp, barlyǵy mamandandyrylǵan aıyppul turaǵyna qoıyldy.
— Tártip buzýshylarǵa qatysty barlyǵy 22 ákimshilik hattama rásimdeldi. Atap aıtqanda, usaq buzaqylyq jasaý, júrgizýshi men jolaýshynyń qaýipsizdik beldigin taqpaý, qarsy qozǵalys jolaǵyna shyǵý, kólik quralyn paıdalaný qaǵıdalaryn buzý, kólik quralyn paıdalaný kezinde belgilengen talaptardy saqtamaý, jol qozǵalysynyń ózge qatysýshylaryna avarııalyq jaǵdaı týǵyzý, sondaı-aq jaıaý júrginshiler men ózge de jol qozǵalysyna qatysýshylardyń jol qozǵalysy qaǵıdalaryn buzý jáne basqa da ákimshilik quqyq buzýshylyqtar anyqtaldy, — delingen habarlamada.
Polıtsııa azamattardy jol qozǵalysy qaǵıdalaryn qatań saqtaýǵa úndedi. Úılený toıy, merekelik kortej nemese ózge de saltanatty is-sharalar jol qozǵalysy qaǵıdalaryn buzýǵa jáne ózge adamdardyń ómiri men densaýlyǵyna qaýip tóndirýge negiz bola almaıdy.
Eske salaıyq, buǵan deıin Almatyda jol apatynan eki adam mert bolǵanyn habarlaǵan edik.
