Ulytaý oblysynda Jeńistiń 81 jyldyǵy keń kólemde toılandy
JEZQAZǴAN. KAZINFORM – Merekelik is-shara teatrlandyrylǵan qoıylymmen bastalyp, ortaǵa saltanatty túrde Memlekettik Tý ákelindi. Qazaqstan Respýblıkasynyń Memlekettik Gımni oryndalyp, jınalǵan jurtshylyq Jeńis rýhyna taǵzym etti.
Óńir turǵyndaryn Ulytaý oblysynyń ákimi Dastan Ryspekov quttyqtap, Jeńistiń tarıhı mańyzyna toqtaldy.
– Qazaq mysynyń qara shańyraǵy – Qarsaqbaı zaýyty soǵys jyldary áskerı ónimder shyǵaryp, jeńisti jaqyndatýǵa ólsheýsiz úles qosty. Bul – bizdiń óńir úshin úlken tarıh, urpaqtan-urpaqqa jalǵasatyn maqtanysh. Qasıetti Ulytaý jerinen shyqqan azamattar maıdan dalasynda da, tylda da tabandylyq pen otansúıgishtiktiń úlgisin kórsetti, - dedi óńir basshysy óz sózinde.
Ulytaýlyqtar maıdanda qaza tapqan bozdaqtar men el tynyshtyǵy jolynda janyn qıǵan erler rýhyn bir mınýt únsizdikpen eske aldy. Qatysýshylar babalar rýhyna taǵzym etip, Máńgilik alaýǵa gúl shoqtaryn qoıdy.
Merekelik is-shara barysynda turǵyndarǵa dástúrli dala ashanasy usynylyp, Jeńis ánderi shyrqaldy.
