Ulytaý oblysynda jeke úıdiń aýlasyndaǵy 100 býma shóp órtenip ketti
ASTANA. KAZINFORM – Ulytaý oblysynyń Sátbaev qalasynda jeke turǵyn úıdiń aýlasynda 100 býma shóp órtendi, dep habarlaıdy Tótenshe jaǵdaılar mınıstrligi.
Vedomstvo málimetinshe, «112» pýltine Sátbaev qalasyndaǵy Stepnaıa kóshesinde órt shyqqany týraly habarlama túsken.
Oqıǵa ornyna jetken qutqarýshylar «Gornıak» saıajaı alqabyndaǵy jeke turǵyn úı aýmaǵynda jınalǵan shóptiń janyp jatqanyn anyqtaǵan.
– TJM qyzmetkerleri jedel túrde órtti sóndirýge kiristi. Órt tolyq sóndirildi. Órtti sóndirýge «Seriktes» JShS qyzmetkerleri men jergilikti atqarýshy organnyń ókilderi de qatysty, – delingen mınıstrlik habarlamasynda.
Oqıǵa saldarynan zardap shekkender joq.
Tótenshe jaǵdaılar mınıstrligi turǵyndarǵa órt qaýipsizdigi erejelerin saqtap, shópti ot kózderinen alys jerde saqtaý qajettigin eskertti.
Aıta keteıik, buǵan deıin Qostanaı oblysynyń Denısov aýdanynda qurǵaq shóp órtenip, jalyn 600 gektar aýmaqty sharpyǵan bolatyn. Órt tolyq sóndirilip, zardap shekkender tirkelmedi.
