Ulytaý oblysynda jastarǵa arnalǵan «Ulytau Go» lageri bastaldy
JEZQAZǴAN. KAZINFORM — Ulytaý oblysynda belsendi jastarǵa arnalǵan «Ulytau Go» jastar lageri ótip jatyr, dep habarlaıdy Ulytaý oblysy ákimdiginiń baspasóz qyzmeti.
27-29 tamyz kúnderi Ulytaý oblysy qoǵamdyq damý basqarmasynyń uıymdastyrýymen jyl saıynǵy «Ulytau Go» jastar lageri bastaý aldy. Atalǵan shara óńirdiń úzdik jáne belsendi 50 jasynyń basyn qosyp otyr.
Lagerge Jezqazǵan, Sátbaev, Qarajal qalalary men Ulytaý, Jańaarqa aýdandarynan jas kásipkerler, volonterler, jumysshy jastar jáne qoǵamdyq belsendiler qatysyp jatyr.
Úsh kúnge josparlanǵan baǵdarlama jastardyń tulǵalyq damýyna, kásibı baǵytyn aıqyndaýǵa jáne jańa ortada tájirıbe almasýyna baǵyttalǵan.
Lager barysynda:
- «Jeke brend qalyptastyrý»,
- «Mobılografııa ereksheligi»,
- «SMM» taqyryptarynda semınar-trenıngter,
- sondaı-aq sporttyq jarystar men qazaq tilindegi ıntellektýaldy «TezTap» oıyny ótedi.
Jastar lagerdiń úshinshi kúni tarıhı orynǵa — Joshy han kesenesine saıahat jasap, Ulytaýdyń rýhanı-mádenı murasymen tanysady.
«Ulytau Go» lageri — jastardyń jańa ıdeıalaryn iske asyrýǵa, kóshbasshylyq qabiletin damytýǵa jáne óńirdiń belsendi jas býynyn biriktirýge arnalǵan mańyzdy alań.