Ulytaý oblysynda jastar saıasatynyń ózekti máseleleri talqylandy
JEZQAZǴAN. KAZINFORM – Búgin Ulytaý oblysynyń ákimi Dastan Ryspekovtiń tóraǵalyǵymen ákimdik janyndaǵy jastar isteri jónindegi keńestiń otyrysy ótti.
Keńes otyrysyna oblystyq basqarma basshylary, qala ákimderi, jastar uıymdarynyń ókilderi men keńes músheleri qatysty.
Jıyn barysynda jastar saıasaty salasyndaǵy ahýal, jastardy jumyspen qamtý jáne Jezqazǵan men Sátbaev qalalaryndaǵy jastar isteri jónindegi Keńesterdiń jumysy qaraldy.
Qoǵamdyq damý basqarmasynyń basshysy Baqytjan Jaılaýbaev óz baıandamasynda 2023–2024 jyldary júzege asyrylyp jatqan «Ulytau zhastary» turǵyn úı baǵdarlamasyna toqtaldy. Onyń aıtýynsha, baǵdarlama aıasynda oblystyq bıýdjetten jyl saıyn 500 mln teńge bólinedi. Sonymen qatar, basqarma basshysy NEET sanatyndaǵy jastardyń úlesi 10,4%-dy (5864 adam) qurap otyrǵanyn málimdedi. Bul – respýblıka boıynsha eń joǵary kórsetkishterdiń biri. Atalǵan sanatty tómendetý boıynsha keshendi sharalar qolǵa alynýda.
Keńes aıasynda jastardy jumysqa ornalastyrý baǵytynda júzege asyrylyp jatqan jobalar týraly aıtyldy. Bul týraly oblystyq jumyspen qamtýdy úılestirý jáne áleýmettik baǵdarlamalar basqarmasynyń basshysy Qurmet Sattybaev baıandady. Onyń ishinde «Jastar tájirıbesi», «Alǵashqy jumys orny» jáne «Kúmis jas» baǵdarlamalary boıynsha naqty kórsetkishter aıtyldy.
Jezqazǵan qalasynyń ákimi Qaırat Abdollauly Shaıjanov qalalyq Jastar resýrstyq ortalyǵynyń jumysy men qurylymyna toqtalyp, 2024 jyldan beri atqarylǵan jumystar jaıly baıandady. Sonymen qatar, ortalyqtyń bıýdjeti men qyzmetkerler sany týraly naqty derekter usynyldy.
2025 jyldyń «Jumysshy mamandyqtar jyly» dep jarııalanýyna baılanysty jastar arasynda jumysshy kásipterdi nasıhattaý týraly sóz qozǵaldy.
Sátbaev qalasynyń ákimi Murat Bóribaev óz kezeginde boıynsha júrgizilip jatqan is-sharalarmen bólisti.
Keńes sońynda qatysýshylar tarapynan suraqtar qoıylyp, naqty usynystar aıtyldy.
Otyrysty qorytyndylaǵan keńes tóraǵasy jastar – el bolashaǵy ekenin, olardyń bastamalaryn qoldaý – memlekettik saıasattyń basym baǵyty ekenin atap ótti.