Ulytaý oblysynda «Jasyl el» baǵdarlamasy aıasynda 700-deı jas jumyspen qamtylady
ASTANA. KAZINFORM – Ulytaý oblysynyń barlyq óńirinde «Jasyl el» jastar eńbek jasaqtary memlekettik áleýmettik tapsyrys aıasynda júzege asyrylyp jatyr. Jobanyń jumysy arnaıy bekitilgen tehnıkalyq erekshelikterge sáıkes uıymdastyrylady.
Búginde oblystyń barlyq óńirinde ónim berýshilermen kelisimsharttar jasalyp, josparǵa saı jumystar bastaldy.
«Jasyl el — 2025» eńbek maýsymyna Ulytaý oblysy boıynsha 14 pen 35 jas aralyǵyndaǵy 700-deı jas tartylmaq.
Onyń ishinde:
• Jezqazǵan qalasynan — 150 jas,
• Sátbaev qalasynan — 150 jas,
• Qarajal qalasynan — 165 jas,
• Ulytaý aýdanynan — 150 jas,
• Jańaarqa aýdanynan — 70 jas qatysady dep josparlanyp otyr.
Baǵdarlama aıasynda áleýmettik jaǵynan osal toptaǵy jastarǵa basymdyq beriledi.
700 dana birińǵaı fırmalyq kıim (sporttyq kúrte, shalbar, fýtbolka, beısbolka jáne rıýkzak) tigýge Ulytaý oblysynyń qoǵamdyq damý basqarmasy tarapynan arnaıy qarjy bólindi.
Baǵdarlamaǵa qatysýshy jastar qala men aýdandarda kógaldandyrý jáne abattandyrý jumystaryna atsalysady. Sonymen qatar túrli taqyryptyq is-sharalar men ekologııalyq aktsııalarǵa belsendi qatysady.
Jasaq quramyndaǵy jumysshylardyń jalaqysy shamamen 85 000 — 95 000 teńge kóleminde belgilengen.
Jumys kúni jastaryna qaraı mynadaı tártipte júrgiziledi:
• 14-16 jas aralyǵy — 4 saǵat,
• 16-18 jas aralyǵy — 6 saǵat,
• 18 jastan joǵary — 8 saǵat.
Úzilis ýaqyty — saǵat 13:00–ten 14:30-ǵa deıin, al senbi men jeksenbi — demalys kúnderi bolyp bekitilgen.
2025 jylǵy eńbek maýsymyna qatysý úshin sáýir aıynda qalalyq nemese aýdandyq Jastar resýrstyq ortalyqtaryna júginý qajet.
«Jasyl el» baǵdarlamasy — jastardyń eńbekke aralasýyna, tabıǵatty qorǵaýǵa jáne týǵan ólkesin kórkeıtýge baǵyttalǵan mańyzdy bastama.