Ulytaý oblysynda jańa emhananyń qurylysy bastaldy
JEZQAZǴAN. KAZINFORM –Jezqazǵan qalasynda táýligine 250 kelýshini qabyldaıtyn zamanaýı emhananyń irgetasy qalandy. Úsh qabatty medıtsınalyq nysannyń jalpy aýmaǵy shamamen 8 500 sharshy metr.
Jobany «Vernyı Kapıtal» kompanııalar tobynyń quramyndaǵy Beeline tsıfrlyq operatory qoldap otyr.
Saltanatty rásimge Ulytaý oblysynyń ákimi Dastan Ryspekov pen qor dırektory Anar Jumaǵulova qatysyp, jańa nysannyń óńir turǵyndary úshin mańyzdylyǵyn atap ótti.
Óz sózinde oblys ákimi Jezqazǵan qalasynyń batys aýdany aldaǵy jyldary óńirdiń jańa damý ortalyǵyna aınalatynyn jetkizdi.
– Jezqazǵan qalasynyń batys aýdany – bolashaǵy zor, qarqyndy damyp kele jatqan aýmaq. Aldaǵy jyldary munda 18 myńǵa jýyq turǵyn qonystanady dep josparlanyp otyr. Jalpy shaǵyn aýdanda 80-nen astam kópqabatty turǵyn úı salý josparlanǵan. Sondyqtan zamanaýı áleýmettik ınfraqurylymdy qatar damytý – bizdiń basty mindetterimizdiń biri. Búgin irgetasy qalanǵan emhana – sol júıeli jumystyń naqty nátıjesi, – dedi óńir basshysy Dastan Ryspekov.
Ulytaý oblysy ákimdigi málimetinshe, jańa medıtsınalyq mekemede konsýltatsııalyq-dıagnostıkalyq kabınetter men 15 oryndyq kúndizgi statsıonar jumys isteıdi. Sonymen qatar sáýlelik dıagnostıka bólimshesi, klınıkalyq-dıagnostıkalyq zerthana, ambýlatorııalyq hırýrgııa ortalyǵy jáne áıelder konsýltatsııasy qarastyrylǵan.
Emhana aýmaǵynda jeke ornalasqan ǵımaratta táýlik boıy qyzmet kórsetetin, toǵyz brıgadalyq jedel járdem stantsııasy ashylady. Bul turǵyndarǵa shuǵyl medıtsınalyq kómekti jedel ári sapaly kórsetýge múmkindik beredi.
