Ulytaý oblysynda jańa dárigerlik ambýlatorııa ashyldy
JEZQAZǴAN. KAZINFORM – Búgin Keńgir aýylynda qaıtarylǵan aktıvter qarajaty esebinen salynǵan jańa dárigerlik ambýlatorııa el ıgiligine berildi. Medıtsınalyq nysannyń ashylý saltanatyna Ulytaý oblysynyń ákimi Dastan Ryspekov pen oblys prokýrory Jasulan Elamanov qatysty.
Ulytaý oblysy ákimdigi málimetinshe, jańa densaýlyq saqtaý nysany táýligine 20-dan astam turǵynǵa qyzmet kórsetýge qaýqarly. Sonymen qatar munda kúndizgi statsıonar jumys istep, 10-ǵa jýyq em túri kórsetiledi. Keńgirlikter úshin zamanaýı talaptarǵa saı medıtsınalyq kómek alýǵa barlyq jaǵdaı jasalǵan.
Saltanatty is-shara barysynda óńir basshysy oblysta qaıtarylǵan aktıvter esebinen áleýmettik mańyzy bar nysandardyń kezeń-kezeńimen salynyp, halyq ıgiligine berilip jatqanyn atap ótti.
Sondaı-aq júıeli jumystardyń júzege asýyna qoldaý kórsetken QR Bas prokýratýrasy men oblys prokýratýrasyna rızashylyǵyn bildirdi.
– Oblys qurylǵan ýaqyttan beri 26 jańa nysan ashyldy. Eki medıtsınalyq mekemege kúrdeli jóndeý jumystary tolyq aıaqtaldy. Qazirgi tańda taǵy bes nysanda jóndeý jumystary jalǵasyp jatyr. Sonymen qatar oblystyq aýrýhana janynan 100 oryndyq jańa korpýs salý arqyly bólimsheni keńeıtý josparlanyp otyr, – dedi óńir basshysy.
Aıta keteıik, Ulytaý oblysynda qaıtarylǵan aktıvter qarajaty esebinen densaýlyq saqtaý jáne bilim berý salalarynda birqatar nysan boı kótergen jáne bıyl kezeń-kezeńimen paıdalanýǵa beriledi dep josparlanyp otyr.
