Ulytaý oblysynda «Zań men tártip» qaǵıdaty aıasynda semınar-kezdesý ótti
JEZQAZǴAN. KAZINFORM – Búgin Ulytaý oblysy qoǵamdyq damý basqarmasynyń uıymdastyrýymen «Zań men tártip: qoǵamdyq qaýipsizdikti qamtamasyz etýdegi memlekettik organdardyń róli» taqyrybynda aqparattyq-túsindirý semınar-kezdesý ótti.
Іs-shara «Zań men tártip» qaǵıdatyn ilgeriletý aıasynda uıymdastyryldy.
Kezdesýdiń negizgi maqsaty — qoǵamdyq qaýipsizdikti qamtamasyz etýdegi memlekettik organdardyń qyzmetin túsindirý, azamattardyń quqyqtyq mádenıetin arttyrý, sondaı-aq memlekettik organdar men azamattyq qoǵam arasyndaǵy ózara yqpaldastyqty nyǵaıtý.
Іs-sharaǵa arhıv jáne kitaphana qyzmetkerleri, qoǵamdyq kelisim salasynyń mamandary, quqyq qorǵaý organdarynyń ókilderi, sondaı-aq úkimettik emes uıym músheleri qatysty. Kezdesý ashyq dıalog formatynda ótip, qatysýshylar ózderin tolǵandyrǵan suraqtaryn qoıyp, naqty ári mazmundy jaýaptar aldy.
Jıyn barysynda qazirgi qoǵamda ózekti bolyp otyrǵan alaıaqtyqtyń aldyn alý máselesine erekshe nazar aýdaryldy. Sońǵy jyldary telefon jáne ınternet arqyly jasalatyn alaıaqtyq áreketterdiń jıilep ketkeni, ásirese aǵa býyn ókilderiniń jıi aldanyp qalatyny aıtyldy. Osy baǵytta oblystyq prokýratýranyń Qoǵamdyq múddelerdi qorǵaý basqarmasynyń aǵa prokýrory Jalǵas Bazarbaıuly Tólenov túsindirý jumystaryn júrgizip, alaıaqtyqtan saqtaný joldaryna toqtaldy.
Sonymen qatar, Polıtsııa departamentiniń ákimshilik polıtsııa basqarmasy bastyǵynyń orynbasary, polıtsııa podpolkovnıgi Arman Muhametjanuly Abılkasımov qoǵamdyq tártipti saqtaý jáne quqyq buzýshylyqtardyń aldyn alý baǵytyndaǵy jumystarmen tanystyrdy.
Kezdesýde Amanat partııasy Ulytaý oblystyq fılıalynyń partııalyq baqylaý jónindegi ınspektory Ershat Momynbaıuly Aýbakırov azamattyq jaýapkershiliktiń mańyzdylyǵyna toqtalsa, úkimettik emes uıymdar atynan Ulytaý jastary qoǵamdyq birlestigi tóraǵasynyń orynbasary Baqyt Bolatovna Bolatova azamattyq qoǵamnyń quqyqtyq mádenıetti qalyptastyrýdaǵy róline nazar aýdardy.
Sondaı-aq, Memlekettik quqyqtyq jumys bóliminiń basshysynyń mindetin atqarýshy Quralaı Temirbekovna Qalmaǵanbetova zańnamalyq ózgerister men azamattardyń quqyqtaryn qorǵaý tetikteri týraly aqparat berdi.
Kezdesý qorytyndysynda qatysýshylar mundaı ashyq dıalogtardyń quqyqtyq saýattylyqty arttyrýǵa, qoǵamdyq qaýipsizdikti nyǵaıtýǵa jáne qoǵamdaǵy turaqtylyqty qamtamasyz etýge oń áser etetinine senim bildirdi.
Іs-sharaǵa qatysyp, óz tájirıbesimen bólisken barlyq spıkerlerge jáne belsendilik tanytqan qatysýshylarǵa alǵys bildirildi.
