Ulytaý oblysynda veterınarııalyq baqylaý ınspektsııasynyń jańa basshysy taǵaıyndaldy
ULYTAÝ. KAZINFORM — Aýyl sharýashylyǵy mınıstrligi júıesinde kezekti kadrlyq ózgeris oryn aldy. Óńirdegi veterınarııalyq baqylaý baǵyty endi salalyq jáne basqarýshylyq tájirıbesi bar mamanǵa senip tapsyryldy.
Aýyl sharýashylyǵy mınıstrligi Veterınarııalyq baqylaý jáne qadaǵalaý komıtetiniń Ulytaý oblysy boıynsha aýmaqtyq ınspektsııasynyń basshysy bolyp Ilham Baqtybaıuly Ámetov taǵaıyndaldy.
Ilham Ámetov joǵary bilimdi, salalyq jáne memlekettik basqarý baǵytynda kásibı daıarlyqtan ótken. Ol S. Seıfýllın atyndaǵy Qazaq agrotehnıkalyq ýnıversıteti, M. H. Dýlatı atyndaǵy Taraz memlekettik ýnıversıteti jáne QR Prezıdenti janyndaǵy Memlekettik basqarý akademııasy oqý oryndaryn veterınarııalyq sanıtarııa men medıtsına, quqyqtaný jáne memlekettik saıasat mamandyqtary boıynsha támamdaǵan.
Eńbek jolyn 2012 jyly Túrkistan oblysyndaǵy jekemenshik uıymdarda bastaǵan.
2016–2021 jyldary Aýyl sharýashylyǵy mınıstrligi Veterınarııalyq baqylaý jáne qadaǵalaý komıtetiniń túrli basqarmalarynda qyzmet atqaryp, jaýapty baǵyttardy úılestirdi.
2021 jyly Komıtettiń Túrkistan oblysy boıynsha aýmaqtyq ınspektsııasy basshysynyń orynbasary bolyp taǵaıyndaldy.
2022 jyldan bastap Aýyl sharýashylyǵy mınıstrliginiń Ádep jónindegi ýákili qyzmetin atqaryp keldi.
Eske salsaq, Ulytaý oblysy boıynsha Tutynýshylardyń quqyqtaryn qorǵaý departamentine Jasulan Dáýletbaev basshy bolyp taǵaıyndaldy.