Ulytaý oblysynda urlanǵan 100-ge jýyq mal ıelerine qaıtaryldy

ASTANA. KAZINFORM – Ulytaý oblysynda polıtseıler 100-ge jýyq maldy ıelerine qaıtardy. Bul týraly Polisia.kz málimdedi.

5 qyrkúıekten bastap óńirde «Mal urysy» jedel-profılaktıkalyq is-sharasy ótkizilip jatyr. Onyń aıasynda polıtsııa qyzmetkerleri 2300 sharýa qojalyǵyn, mal soıatyn 6 arnaıy oryndy, sondaı-aq et satatyn 34 dúken men bazardy tekserdi.

Krımınaldy polıtsııanyń júıeli jumysynyń nátıjesinde 15 mal urlyǵy faktisi ashyldy. Jedel-izdestirý is-qımyldary barysynda 17 adamnan turatyn 4 qylmystyq top ustaldy. Olardyń ishinde 6 adam sot sheshimimen túrli merzimge bas bostandyǵynan aıyryldy.

Sonymen qatar mal urlyǵynyń eki epızodyna qatysy bar eki tulǵanyń da kinási dáleldendi. Quqyq qorǵaý organdarynyń jumysy nátıjesinde 100-ge jýyq mal ıelerine qaıtaryldy.

Іs-shara aıasynda qaraýsyz júrgen maldar ýaqytsha aıyp turaqtaryna qamalady. Qazirgi tańda oblys boıynsha 26 arnaıy mal qamaıtyn oryn jumys isteıdi.

Aıta keteıik, polıtsııa úsh kúnde 100-den astam mal urlyǵyn ashty.