Ulytaý oblysynda Uly Otan soǵysyndaǵy Jeńistiń 80 jyldyǵy atalyp ótti
JEZQAZǴAN. KAZINFORM — Jeńistiń 80 jyldyǵyna oraı alǵashqy merekelik sharalar Ulytaý aımaǵynda tańerteń erte bastaldy. Іs-shara Uly Otan soǵysy batyrlaryna arnalǵan eskertkishterge gúl shoqtaryn qoıý rásimimen ashyldy.
Halqymyzdyń HH ǵasyrda basynan ótkergen eń aýyr kezeńderiniń biri — Ekinshi dúnıejúzilik soǵys. Tarıhı derekterge súıensek, qan maıdanǵa 1,2 mıllıon qazaqstandyq attanyp, onyń 600 myńy elge oralmaǵan. Búgin — fashızmdi jeńip, adamzatty zulmattan qutqarǵan Uly Jeńistiń 80 jyldyǵy. Bul aıtýly data elimizdiń túkpir-túkpirinde keńinen atalyp ótip jatyr.
Atap aıtqanda, Jezqazǵan qalasyndaǵy «Dańq» alleıasynda «Uly Jeńis – urpaqqa amanat» atty saltanatty is-shara ótti. Jınalǵan jurtshylyq aldymen Qazaqstan Respýblıkasynyń Memlekettik Gımnin oryndady. Budan keıin qatysýshylar soǵysta qaza tapqandardy bir mınýt únsizdikpen eske alyp, máńgilik alaýǵa gúl shoqtaryn qoıdy. Oblys ákimi Dastan Ryspekov pen zııaly qaýym ókilderi Otan úshin janyn qıǵan bozdaqtar rýhyna taǵzym etti.
Dastan Ryspekov ardagerlerdi merekemen quttyqtap, eńbek maıdanynda kórsetken erligi úshin alǵys bildirdi.
Memorıal aýmaǵynda maıdan dalasyndaǵy jaýyngerlerdiń ómirin beıneleıtin teatrlandyrylǵan kórinis kórsetilip, dala ashanasy uıymdastyryldy.
Іs-shara keshki saǵat 19:00-de Alash alańynda ótetin merekelik kontserttik baǵdarlamamen jalǵaspaq.
Eske salaıyq, Ulytaý óńirinen 16 myńǵa jýyq azamat maıdanǵa attanyp, onyń 10 myńnan astamy elge oralmaǵan. Qazirgi tańda óńirdegi 397 tyl eńbekkerine Uly Jeńistiń 80 jyldyǵyna arnalǵan mereıtoılyq medal tabystaldy.