Ulytaý oblysynda temir ken ornyn zańsyz satqan kásipker sottaldy
JEZQAZǴAN. KAZINFORM – Bas prokýratýra Shveıtsarııa ınvestory Lıýk ıArchık Kornelııaǵa qatysty 3,5 mıllıard teńge kólemindegi alaıaqtyq faktisi boıynsha qylmystyq isti tergep, aıaqtady.
2016 jylǵy qyrkúıekte qazaqstandyq kásipker jalǵan qujattardy paıdalanyp, shveıtsarııalyq ınvestorǵa tıesili «ÝK Rınkom» JShS-niń 80%-dyq úlesin 63 mıllıon teńgege zańsyz satqany anyqtaldy. Atalǵan kásiporyn Ulytaý oblysynda temir ken ornyn ıgerýmen aınalysqan.
2026 jylǵy 27 sáýirdegi sot úkimimen azamat M. Qylmystyq kodekstiń 190-babynyń 4-bólimi, 2-tarmaǵy (asa iri mólsherdegi alaıaqtyq) boıynsha kináli dep tanylyp, qylmystyq jolmen alynǵan múlki tárkilenip, 6 jyl 8 aıǵa bas bostandyǵynan aıyryldy.
Sheteldik ınvestordyń 3,5 mıllıard teńge kólemindegi azamattyq talaby tolyq kólemde qanaǵattandyryldy.
Bas prokýratýra tergep-tekserýdiń jan-jaqty, obektıvti jáne sapaly júrgizilýin qamtamasyz etip, nátıjesinde sheteldik ınvestordyń buzylǵan quqyqtary tolyq qalpyna keltirildi.
Aıta ketsek, budan buryn Almatyda ýrbanıstıka basqarmasynyń burynǵy basshysyna qatysty sot qaıta bastalǵanyn habarlaǵanbyz.
