Ulytaý oblysynda Telegram arqyly jumys istegen halyqaralyq esirtki arnasy joıyldy
ASTANA. KAZINFORM – Ulytaý oblysynda «Kaef Mafia» Telegram-dúkeni arqyly sıntetıkalyq esirtki taratýmen aınalysqan transulttyq qylmystyq toptyń qyzmeti toqtatyldy.
Arnaıy prokýrorlardyń málimetinshe, qylmystyq shema halyqaralyq sıpatqa ıe bolǵan. Top músheleri esirtkini jetkizý, býyp-túıý jáne taratý jumystaryn uıymdastyryp, tólemderdi krıptovalıýta arqyly qabyldaǵan.
Sonymen qatar qylmystyq toptyń negizgi maqsattarynyń biri azamattardy, ásirese jastardy psıhotroptyq zattardyń zańsyz aınalymyna tartý bolǵan.
Aıta keteıik, 2025 jyly osy is boıynsha toptyń eki múshesi sot úkimimen kináli dep tanylyp, 16-18 jylǵa bas bostandyǵynan aıyrylǵan. Úkim zańdy kúshine engen.
- Alaıda arnaıy prokýrorlar júrgizgen qosymsha tergeý barysynda qylmystyq jeliniń qalǵan bóligi áshkerelendi. Belgisiz tulǵalarǵa qatysty bólek qylmystyq is tirkeldi.
Jedel-izdestirý is-sharalary nátıjesinde Qaraǵandy jáne Ulytaý oblystary aýmaǵynda toptyń úsh qatysýshysy ustalyp, olardan iri kólemde sıntetıkalyq esirtki tárkilendi.
Kúdiktilerdiń tsıfrlyq tasymaldaǵyshtaryn taldaý barysynda qosymsha qatysýshylar anyqtalyp, Jezqazǵan qalasynyń taǵy eki turǵyny ustaldy. Olardan shamamen 1 kılogramm psıhotroptyq zattar tabylǵan, - dep jazdy qadaǵalaýshy organnan.
Tergeý barysynda jetkizýshilerdiń biri de anyqtalyp, odan 850 gramm esirtki tárkilendi. Keıin jetkizý arnasy tolyq ashylyp, jóneltýshi retinde Qaraǵandy qalasynyń turǵyny anyqtaldy. Onyń turǵylyqty jerinen taǵy 800 gramm psıhotroptyq zat alyndy.
Júrgizilgen operatsııa nátıjesinde qylmystyq jeliniń negizgi býyny joıylyp, zańsyz aınalymnan shamamen 3,5 kılogramm sıntetıkalyq esirtki tárkilendi.
Qazirgi ýaqytta úsh aıyptalýshyǵa qatysty qylmystyq is sotta qaralýda, taǵy tórt tulǵa boıynsha sotqa deıingi tergeý aıaqtalý satysynda.
Qylmystyq-protsestik kodekstiń 201-babyna sáıkes ózge aqparat jarııa etýge jatpaıdy.
Aıta keteıik, ІІM jyl basynan beri shamamen úsh tonna esirtkiniń aınalymǵa shyǵýyna tosqaýyl qoıdy.
