Ulytaý oblysynda «Taza Qazaqstan» aktsııasy aıasynda 27 myńnan astam aǵash kósheti otyrǵyzyldy
JEZQAZǴAN. KAZINFORM – Ulytaý oblysynda respýblıkalyq «Taza Qazaqstan» ekologııalyq aktsııasynyń jańa kezeńin bastaýǵa arnalǵan aýqymdy is-shara ótkizildi.
Atalǵan naýqan barysynda Jezqazǵan qalasynyń jastary men eko-volonterleri qala kóshelerin tazalaý jumystarynda belsendilik tanytty.
Ulytaý oblysynda «Taza Qazaqstan» tujyrymdamasy júıeli túrde júzege asyrylyp jatyr. 2029 jylǵa deıingi is-qımyl josparyna sáıkes óńirde 43 is-shara josparlanǵan. Onyń ishinde 2025 jylǵa arnalǵan 34 sharanyń 32-si oryndalyp, 2-eýi ótpeli retinde jalǵasýda. Bul sharalar aıasynda halyq kóp jınalatyn oryndarǵa ekobokstar men fandomattar ornatý, sondaı-aq bıznestiń áleýmettik jaýapkershiligi boıynsha «Paryz» konkýrsyn «Ekologııaǵa qosqan úlesi úshin» nomınatsııasynda ótkizý qarastyrylǵan.
2025 jyly oblysta 13 oblystyq jáne 17 qalalyq senbilik uıymdastyryldy. Sonymen qatar «Taza beısenbi» aktsııasy turaqty túrde ótkizilip keledi. Jalpy abattandyrý jumystaryna shamamen 87 myń adam qatysyp, 1 423 birlik arnaıy tehnıka jumyldyryldy. Nátıjesinde 8 myń tonnadan astam qoqys shyǵarylyp, 27 myńnan astam aǵash kósheti otyrǵyzyldy.
Sonymen qatar óńirde «Taza jaǵalaý», «Taza aımaq», «Móldir bulaq», «Týǵan jer – altyn besigim», «Jer saǵaty», «Taza qala», «Úlgili aýyl» sııaqty ekologııalyq jobalar iske asyrylyp, «ProEko» ekologııalyq jobalar baıqaýy men «Tabıǵatty aıala» atty jas ólketanýshylar, ekologtar jáne natýralıster forýmy ótkizildi.
2026 jylǵa arnalǵan josparǵa sáıkes 34 is-shara qarastyrylǵan, onyń ishinde qazirgi ýaqytqa deıin 3 shara júzege asyryldy. Barlyq jumystar aı saıynǵy monıtorıng arqyly baqylanyp, olardyń sapaly ári ýaqtyly oryndalýy qamtamasyz etilip jatyr.
Atalǵan is-sharalardyń negizgi maqsaty – jas urpaqtyń ekologııalyq sanasyn qalyptastyrý jáne qorshaǵan ortany qorǵaýǵa jeke jaýapkershilikti arttyrý. Sondaı-aq «Taza Qazaqstan» ekologııalyq aktsııasy óńir turǵyndaryn biriktirip, tabıǵatqa janashyrlyqpen qaraý mádenıetin qalyptastyrýǵa jáne halyqtyń ómir súrý sapasyn jaqsartýǵa baǵyttalǵan.
