Ulytaý oblysynda taǵy 30 otbasy baspanaly boldy
JEZQAZǴAN. KAZINFORM – Ulytaý oblysynyń Sátbaev qalasynda turǵyn úı kezeginde uzaq jyl turǵan 30 otbasy jańa páterdiń kiltine ıe boldy. Bul týraly Ulytaý oblysy ákimdiginiń baspasóz qyzmeti habarlady.
Qurylysy aıaqtalǵan jańa turǵyn úılerdegi páterler halyqtyń áleýmettik osal toptary men ózge de arnaıy sanattar boıynsha kezekte turǵan azamattarǵa berildi.
Jalpy, bıylǵy jyldyń sońyna deıin Ulytaý oblysynda 900-ge jýyq otbasyn baspanamen qamtamasyz etý josparlanyp otyr.
Páter kiltterin Sátbaev qalasynyń ákimi Murat Bóribaev saltanatty túrde tabystap, qonys ıelerin quttyqtady.
– Ózderińiz biletindeı, mamyr aıynda da 30 otbasynyń jańa baspanaǵa qol jetkizgen qýanyshyna ortaq bolǵan edik. Búgin sol ıgi istiń jalǵasy retinde taǵy birqatar otbasyn qonys toıymen quttyqtap otyrmyz. Qalamyzdaǵy turǵyn úı qoryn jańǵyrtý jáne turǵyndardy baspanamen qamtamasyz etý baǵytyndaǵy jumystar aldaǵy ýaqytta da júıeli túrde jalǵasady, – dedi qala ákimi.
Jańa páter ıesi Bekzat Balǵabaeva kópten kútken baspanaǵa 2014 jyldan beri kezekte turǵannan keıin qol jetkizgenin aıtty.
– Búgin meniń otbasym úshin erekshe qýanyshty kún boldy. Osy ýaqyt ishinde armanymyzdyń oryndalýyn kúttik. Endi óz úıimizdiń kiltin alyp, úlken qýanyshqa bólenip otyrmyz. Osyndaı múmkindik jasap, qoldaý kórsetken qala basshylyǵyna jáne memleketimizge alǵysymdy bildiremin. Ár otbasy osyndaı qýanyshqa jetsin, – dedi ol.
Taǵy bir jańa qonys ıesi Birjan Qojagýlov ta baspanaǵa 2014 jyldan beri kezekte turǵanyn jetkizdi.
– Men ІІ toptaǵy múgedekpin. Búgin eki bólmeli jańa páterdiń kiltin alyp, úlken baqytqa kenelip otyrmyn. Bul – men úshin ǵana emes, jaqyndarym úshin de úlken qýanysh. Osyndaı múmkindik jasap, qoldaý kórsetken memleketke, oblys jáne qala basshylyǵyna shynaıy rızashylyǵymdy bildiremin. Baspana kezeginde turǵan barlyq azamatqa osyndaı qýanyshty kún buıyrsyn, – dedi jańa páter ıesi.
Ákimdiktiń málimetinshe, joba Ulytaý oblysy ákimdigi men Otbasy bank arasyndaǵy yntymaqtastyq týraly kelisim aıasynda júzege asyrylyp jatyr.
Aıta keteıik, oblys qurylǵannan beri óńirde 400 myń sharshy metrge jýyq turǵyn úı paıdalanýǵa berildi. Al bıyl 73 myń sharshy metr turǵyn úıdiń qurylysy aıaqtalady dep josparlanyp otyr.
