Ulytaý oblysynda seıf urlaǵandar ustaldy: olardyń áreketi vıdeoǵa túsip qalǵan
ASTANA. KAZINFORM – Krımınaldyq polıtsııa qyzmetkerleri asa iri mólsherde múlikti urlaýǵa baılanysty qylmysty ashty.
Naýryz aıynda Jáırem kentiniń turǵynynan polıtsııa bólimine aryz túsken. Onyń aıtýynsha, keshki ýaqytta belgisiz tulǵalar metall tordy julyp, plastık terezeni kúshpen ashyp, jeke turǵyn úıge kirgen. Qaskóıler metall seıfti qoldy qylǵan. Seıftiń ishinde aqsha, jyljymaıtyn múlikke qatysty qujattar jáne asyl tastarmen kómkerilgen altynnan jasalǵan kóptegen zergerlik buıym bolǵan.
ІІM baspasóz qyzmeti málimetinshe, jalpy keltirilgen materıaldyq shyǵyn 9 mıllıon teńgeden asty.
Qylmys bolǵan sát JBO kameralaryna túsip qalǵan. Vıdeoda eki er adamnyń seıfti kóterip alyp shyqqany kórinedi.
Jedel-izdestirý is-sharalary barysynda polıtsııa qyzmetkerleri Almaty, Qaraǵandy qalalary men Jáırem kenti aýmaǵynda 27 men 39 jas aralyǵyndaǵy úsh kúdiktini anyqtap, ustady. Olardyń ekeýi — Jańaarqa aýdanynyń turǵyndary, aǵaıyndy azamat. Barlyq kúdikti ýaqytsha ustaý ızolıatoryna qamaldy.
Qazirgi ýaqytta sotqa deıingi tergeý amaldary júrgizilip jatyr.
Mundaı qylmys úshin múlki tárkilene otyryp, eki jyldan jeti jylǵa deıin bas bostandyǵynan aıyrý jazasy kózdelgen.
Buǵan deıin asa iri mólsherde urlyq jasaǵany úshin kúdikti Grýzııadan ekstradıtsııalanǵanyn jazǵan bolatynbyz.
