Ulytaý oblysynda sanıtarııalyq-epıdemıologııalyq qyzmet mamandary marapattaldy
JEZQAZǴAN. KAZINFORM - Búgin Ulytaý oblysynda birqatar mamanǵa qurmet kórsetilip, marapattar tabystaldy. Saltanatty rásimde marapattardy Ulytaý oblysy ákiminiń orynbasary Zına Aqylbekova tabys etti.
Aıta keteıik, bıyldan bastap 15 qyrkúıek resmı túrde Sanıtarııalyq-epıdemıologııalyq qyzmet jumyskeriniń kúni bolyp bekitildi. Bul — halyqtyń densaýlyǵyn qorǵaýda aıanbaı eńbek etip júrgen mamandardyń eńbegin ádil jáne laıyqty baǵalaýdyń belgisi.
Saltanatty sharada oblys basshylyǵy ardagerler men sanıtarııalyq qyzmet mamandaryna alǵys bildirdi.
– Qurmetti ardagerler men sanıtarııalyq-epıdemıologııalyq qyzmet mamandary! Sizder kún saıyn túrli aýrýlardyń aldyn alý, sanıtarııalyq qaýipsizdikti qamtamasyz etý jáne epıdemııany baqylaý baǵytynda qajyrly eńbek etip kelesizder. Joǵary kásibı bililikterińiz halyqtyń densaýlyǵyn qorǵaýǵa, turmys sapasyn arttyrýǵa zor úles qosyp otyr. Ásirese COVID-19 pandemııasynyń eń aýyr kezeńinde óz ómirlerińiz ben densaýlyqtaryńyzǵa qaýip tóndirip, indetke qarsy tabandylyq tanyttyńyzdar. Búgin sizder juqpaly aýrýlardyń aldyn alýmen qatar, tutynýshylardyń quqyqtaryn qorǵap, taýarlar men qyzmetterdiń sapasyn, eńbek pen turmys jaǵdaılaryn baqylap otyrsyzdar. Ulytaý oblysy azamattarynyń ál-aýqaty kóbine sizderdiń kásibılikterińiz ben adaldyǵyńyzǵa baılanysty. Osy jaýapty ári qıyn eńbekterińiz úshin shynaıy alǵys bildiremin, – dedi Zına Aqylbekova.
