Ulytaý oblysynda renovatsııa baǵdarlamasy qarqyndy túrde bastaý aldy
JEZQAZǴAN.KAZINFORM - Ulytaý oblysynda turǵyn úı qoryn jańǵyrtýǵa baǵyttalǵan aýqymdy renovatsııa baǵdarlamasy iske qosyldy.
Joba aıasynda ınvestorlar qarajatynyń qoldaýymen Jezqazǵan, Sátbaev jáne Qarajal qalalarynda apatty dep tanylǵan úıler kezeń-kezeńimen súrilip, olardyń ornyna zamanaýı turǵyn úı keshenderi boı kótermek.
Qazirgi tańda oblys ortalyǵy – Jezqazǵan qalasyndaǵy Abaı kóshesinde ornalasqan tórt turǵyn úı qorshaýǵa alynyp, daıyndyq jumystary júrgizilip jatyr. Aldaǵy on kún ishinde olardy súrip, jańa qurylys jumystary bastalmaq. Bul bastama otandyq ınvestorlardyń qoldaýymen júzege asyrylý ústinde. Atalǵan aýmaqta komfort sanatyndaǵy bes qabatty eki turǵyn úı salý josparlanǵan. Sonymen qatar, aýlalar tolyq abattandyrylyp, zamanaýı jedelsatylar ornatylady.
Sátbaev qalasyndaǵy apatty úıler boıynsha da jumystar aldaǵy bir aı ishinde bastalady dep kútilip otyr
Aıta ketý kerek, tozyǵy jetken turǵyn úı qoryn jańartý maqsatynda Ulytaý oblysynyń ákimdigi qytaılyq kompanııalarmen yntymaqtastyq ornatyp, tıisti memorandýmdarǵa qol qoıǵan bolatyn. Sonyń nátıjesinde sheteldik ınvestıtsııalar tartylyp, 40-qa jýyq eski úıdiń ornyna kópqabatty zamanaýı turǵyn úıler salý josparlanyp otyr.
Jalpy alǵanda, oblys boıynsha 120 turǵyn úı apatty dep tanylǵan. Osy máseleni júıeli túrde sheshý maqsatynda renovatsııa baǵdarlamasyn iske asyrýǵa ýákiletti uıym retinde «Ulytaý» áleýmettik-kásipkerlik korporatsııasy aıqyndaldy. Korporatsııa barlyq 120 úıdi kezeń-kezeńimen jańǵyrtý úshin ınvestorlar tartý jumystary júrgizilip jatyr.
