Ulytaý oblysynda prokýrorlardyń aralasýynan keıin ınvestorǵa 55 mln teńge qaıtaryldy
JEZQAZǴAN. KAZINFORM – Ulytaý oblysy Sátbaev qalasynyń prokýratýrasy Investorlardyń quqyqtaryn qorǵaý komıtetimen birlesip, jel elektr stantsııasyn salý jobasyn júzege asyryp jatqan «Mezgilder Qushteri» JShS-niń quqyqtaryn qorǵady. Bul týraly Qazaqstan Bas prokýratýrasynyń baspasóz qyzmeti habarlady.
Investordyń quqyqtarynyń buzylýy kásipkerlik sýbektileriniń ótinishterin qaraý kezinde zańdylyqtyń saqtalýyna júrgizilgen taldaý barysynda anyqtaldy.
Belgili bolǵandaı, kompanııa 2025 jyldyń shilde aıynan bastap ımporttalǵan jabdyqtar boıynsha artyq tólengen qosylǵan qun salyǵyn qaıtarý máselesimen memlekettik kirister organyna birneshe ret júgingen. Barlyq qajetti qujatty usynǵanyna jáne qaıta-qaıta ótinish bergenine qaramastan, másele uzaq ýaqyt boıy sheshimin tappaǵan.
Salyq kodeksiniń talaptaryna sáıkes, salyq bereshegi bolmaǵan jaǵdaıda artyq tólengen soma salyq tóleýshiniń ótinishi negizinde zańda belgilengen merzimderde qaıtarylýǵa tıis.
Investordyń buzylǵan quqyqtaryn qalpyna keltirý maqsatynda qala prokýratýrasy prokýrorlyq qadaǵalaý aktisin engizdi. Qabyldanǵan sharalardyń nátıjesinde kompanııaǵa jalpy somasy 55 mln teńge artyq tólengen salyq tólemderi qaıtaryldy.
Ulytaý oblysynyń prokýratýrasy ákimshilik kedergilerge tap bolǵan ınvestorlardy +7 (775) 873-66-36 telefony nemese 115 Call-ortalyǵy arqyly habarlasýǵa shaqyrady.
Aıta ketsek, budan buryn tutynýshylardyń 400 mıllıon teńgeden astam qarajaty qaıtarylǵanyn jazǵanbyz.
