Ulytaý oblysynda prokýratýra aralasqannan keıin turǵyn úı sertıfıkattary berildi

ASTANA. KAZINFORM — Ulytaý oblysynyń prokýratýrasy Qarajal qalasynda turǵyn úı sertıfıkattaryn berý tártibine qatysty máseleni sheshti. Buǵan deıin sertıfıkat mólsheri men ony alýǵa quqyǵy bar azamattardyń sanattary belgilenbegen. Sonyń saldarynan 700-den astam adamnyń memlekettik qoldaýdy paıdalaný múmkindigi shektelgen.

Ulytaý oblysynda prokýratýra aralasqannan keıin turǵyn úı sertıfıkattary berildi
Foto: Kazinform/JI

Prokýratýra júrgizgen taldaý barysynda jergilikti máslıhattyń turǵyn úı sertıfıkattarynyń mólsheri men alýshylar sanattaryn bekitý týraly sheshimi bolmaǵany anyqtaldy.

Bul jaǵdaı ıpotekalyq nesıe arqyly baspana satyp alatyn azamattarǵa arnalǵan memlekettik qoldaý baǵdarlamasynyń iske asýyna kedergi keltirgen.

Turǵyn úı zańnamasyna sáıkes, sertıfıkattar ıpotekalyq turǵyn úı qaryzy boıynsha bastapqy jarnany tolyq nemese ishinara óteýge beriledi.

Prokýratýranyń aralasýynan keıin Qarajal qalasynyń máslıhaty sertıfıkat mólsheri men ony alýǵa quqyǵy bar azamattardyń sanattaryn bekitti.

Endi sertıfıkat ıpotekalyq qaryz somasynyń 10 paıyzy mólsherinde beriledi. Onyń kólemi 1,5 mıllıon teńgeden aspaıdy.

Osylaısha, 700-den astam azamat baspana alý kezinde memlekettik qoldaýdy paıdalana alady.

Eske salaıyq, buǵan deıin Qostanaıda bıýdjet qarajatyna salynǵan 65 úı áli satylmaı turǵanyn habarlaǵan edik.