Ulytaý oblysynda polıtsııa kóktaıǵaqqa baılanysty tasjoldarda baqylaýdy kúsheıtti
ASTANA. KAZINFORM — Polıtseıler kólikterdiń qysqy dóńgelekterge aýystyrylýyn tekserip, júrgizýshilerge jol qaýipsizdigi talaptaryn túsindirdi.
Oblystyq polıtsııa departamentiniń baspasóz qyzmeti habarlaǵandaı, aýa raıynyń kúrt ózgerip, kóktaıǵaq paıda bolýyna baılanysty Jezqazǵan — Qaraǵandy avtojolynyń boıynda patrýldik polıtsııa rotasynyń ınspektorlary profılaktıkalyq jumystar júrgizdi.
— Qar jaýyp, aýa raıynyń kúrt ózgerýine baılanysty júrgizýshilerge jolda saq bolýdy eskertemiz. Patrýldik polıtsııa qyzmetkerleri jolda avtokólikterdi toqtatyp, júrgizýshilerge qysqy dóńgelekterge aýysý, kóliktiń tehnıkalyq jaǵdaıyn tekserý jáne jolda qaýipsizdik talaptaryn saqtaý qajettigin túsindirip jatyr, — delingen habarlamada.
Polıtsııa júrgizýshilerdi jyldamdyq rejımin, qaýipsiz araqashyqtyqty saqtaýǵa jáne jolda barynsha muqııat bolýǵa shaqyrady.
Osyǵan deıin «QazAvtoJol» UK júrgizýshilerge eskertý jasap, Qazaqstannyń 11 oblysynda joldar taıǵaq bolýy múmkin ekenin málim etti.
