Ulytaý oblysynda polıtseıler órtengen úıdiń terezesinen úsh balany qutqaryp qaldy

JEZQAZǴAN. KAZINFORM – Sátbaev qalasynda kópqabatty turǵyn úıdiń birinshi qabatynda órt shyǵyp, tártip saqshylarynyń jedel áreketiniń arqasynda úsh bala aman qaldy.

Patrýldik polıtsııa vzvodynyń qyzmet ınspektorlary Áset Abdýakıtov pen Nurbolat Nurǵabyl qala kóshesin patrýldeý kezinde páterdiń terezesinen shyqqan jalyndy baıqap, birden kómekke umtylǵan.

- Dál sol sátte syrtqa júgirip shyqqan turǵyn páter ishinde kámeletke tolmaǵan úsh balanyń qalyp qoıǵanyn aıtqan. Polıtseıler esh oılanbastan páterge kirip, tósektiń astynan bir balany taýyp, qaýipsiz jerge shyǵarǵan.

Birinshi balany qutqarǵannan keıin olar ekinshi bólmege ótpek bolǵanymen, jalynnyń qatty órshýi kedergi keltirgen. Osydan keıin tártip saqshylary syrtqa shyǵyp, terezeniń toryn julyp alyp, qalǵan eki balany tereze arqyly shyǵaryp úlgergen, - dep jazdy ІІM baspasóz qyzmetinen.

Órt sóndirý qyzmeti dereý shaqyrylyp, tilsiz jaý tolyqtaı aýyzdyqtaldy. Oqıǵa saldarynan eshkim zardap shekken joq.

Aıta keteıik, Astanadaǵy kópqabatty úıdegi órtten 33 adam evakýatsııalandy.