Ulytaý oblysynda perzenthana joq – Berik Ábdiǵalıuly
Ulytaý oblysynyń ákimi Berik Ábdiǵalıuly Jibek Joly telearnasyndaǵy «Ýáde» baǵdarlamasynda oblys bólingeli qandaı jumystar atqarylyp jatqanyn aıtty, dep habarlaıdy Kazinform.
«Bizdiń oblys Qaraǵandy oblysynan bólingende aıaqtalmaı qalǵan birneshe problema boldy. Bıyl da sheshilmegen máseleler bar. Máselen, Jezqazǵan qalasynda 12 jyldan beri salynbaı turǵan 320 oryndyq balabaqsha bar. Qurylysy bitpegen sport kesheni bar, onda eki merdiger sottasyp jatyr. Terekti aýylynda mekteptiń qurylysy aıaqtalmaǵan, Sátpaev qalasynda balabaqsha men oqýshylar saraıy, Aqtúbek aýylyndaǵy sport zaly sekildi orta jolda qalǵan jobalar kóp», - dedi Berik Ábdiǵalıuly.
Ákimniń aıtýynsha, Jezqazǵanda oblys ortalyǵy bolmaǵan 25 jylda áleýmettik nysandardan bir mektep qana salynǵan.
«Pandemııa kezinde berilgen modýldik aýrýhanany eseptemegende, basqa nysandar soǵylmady. Memleket basshysynyń oblysty bólý týraly ádiletti sheshimi shyqqanda halyq qýandy. Jobalar bastalýyn bastalǵan, biraq sońynda merdigerler sottasyp, talasyp, sybaılas jemqorlyqqa baılanysty toqtatylǵan nysandar bar. Birinshi kezekte osylardy qolǵa aldyq. Bir mekteptiń qurylysy problemalyq bolǵandyqtan múldem almadyq, ony Qaraǵandy oblysynyń ózi kelesi jyly aıaqtap beretin boldy», - dedi B. Ábdiǵalıuly.
Sonymen birge, ákim oblysta balalar aýrýhanasy joq ekenin, kóptegen medıtsınalyq mekeme jabylyp qalǵanyn basa aıtty.
«Olardy qalpyna keltirý úshin taǵy 2-3 jyl ýaqyt qajet. Birinshi kezekte Úkimetke júginip, perzenthananyń jobalyq-smetalyq qujattamasyn ázirlep jatyrmyz. Bosanatyn áıelder kópsalaly aýrýhana ishindegi bólimge barady. Al jańa zamanaýı qondyrǵylary bar bólek perzenthana ǵımaraty joq. Onkologııalyq dıspanser joq, bul da aýrý da artyp kele jatyr. Bul tek densaýlyq salasy ǵana. Qazir osynyń bárin esepteý, qujattaryn daıyndaý jumystary júrip jatyr. Qarajatty Úkimetten surap jatyrmyz», - dedi oblys ákimi.
