Ulytaý oblysynda ortasha jalaqy qansha

JEZQAZǴAN. KAZINFORM — Bıyl Ulytaý oblysynda jańa nysandardy qurý jáne jumys istep turǵan nysandardy keńeıtý arqyly 2 200 jumys orny quryldy jáne 8 200 adam jumysqa ornalastyryldy. Bul týraly oblys ákimi Dastan Ryspekov eseptik kezdesýinde aıtyp berdi. 

Óńir basshysynyń aıtýynsha, jumyssyzdyq deńgeıi 4,1% bolǵan, bul jalpy respýblıkalyq kórsetkishten tómen.

— Bıylǵy jyldyń úshinshi toqsanynyń qorytyndysy boıynsha ortasha aılyq jalaqy (515 543 teńgeden 554 277 teńgege deıin) 7,5%-ǵa ósti. 10 aıdyń qorytyndysy boıynsha ataýly áleýmettik kómek alýshylar otbasy sany 351 otbasydan 340 otbasyǵa deıin 3,1%-ǵa azaıdy, — dedi Dastan Ryspekov elordada Ortalyq kommýnıkatsııalar qyzmetinde.

Sondaı-aq, 2025 jyly «Jumysshy mamandyqtar jyly» aıasynda birqatar is-sharalar ótkizildi. Oǵan jumysshy mamandyqtardyń abyroıyn arttyrý, kadr daıarlaý sapasyn kóterý, jumys berýshilermen ózara is-qımyldy keńeıtý baǵyttary kirgen.

Aıta keteıik, Ulytaý oblysynyń bıýdjeti 30 mlrd teńgege artty.

Buǵan deıin Dastan Ryspekov Jezqazǵanda eski fabrıka ǵımaraty kásipkerlerge beriletinin aıtqan edi.

Sondaı-aq, Ulytaý oblysy áleýmettik azyq-túlik taýarlarynyń 4 túri boıynsha ózin-ózi qamtamasyz etedi.