Ulytaý oblysynda mekteptegi býllıngti jasyrý deregi anyqtaldy
ASTANA. KAZINFORM – Ulytaý oblysynyń prokýratýrasy kámeletke tolmaǵandardyń quqyqtary men zańdy múddelerin qorǵaý baǵytyndaǵy jumystar aıasynda mektepterdegi birqatar zań buzýshylyqtardy anyqtady.
Vedomstvo málimetinshe, Jańaarqa aýdany prokýratýrasynyń taldaýy barysynda oqýshylardy tamaqtandyrýdy uıymdastyrý kezinde sanıtarııalyq talaptardyń saqtalmaǵany belgili bolǵan.
Prokýrorlyq qadaǵalaý aktisin qaraý nátıjesinde mektep ashanalaryndaǵy mázir sanıtarııalyq talaptarǵa sáıkestendirilip, tegin tamaqpen qamtylǵan 2534 balanyń kúndelikti taǵam úlesi ulǵaıtylǵan. Sonymen qatar usynylatyn taǵamdardyń sapasyna baqylaý kúsheıtildi.
– Jiberilgen zań buzýshylyqtar úshin jaýapty laýazymdy tulǵalar tártiptik jaýapkershilikke tartyldy, – dep habarlady prokýratýra.
Budan bólek, bilim berý uıymdaryndaǵy beınebaqylaý kameralaryna júrgizilgen monıtorıng barysynda aýdan mektepteriniń birinde kámeletke tolmaǵan balaǵa qatysty júıeli qorlaý men dene jaraqatyn keltirý faktileri arqyly býllıngti jasyrý deregi anyqtalǵan.
Prokýratýranyń aralasýynan keıin kináli kámeletke tolmaǵandardyń ata-analary men bilim berý uıymy dırektorynyń orynbasary ákimshilik jaýapkershilikke tartyldy.
– Balalardyń qaýipsizdigin qamtamasyz etý jáne bilim berý uıymdaryndaǵy quqyq buzýshylyqtardyń aldyn alý baǵytyndaǵy jumystar jalǵasýda, – dep málimdedi vedomstvo.
Aıta keteıik, Úkimet basshysy jaýapty mınıstrlikterdiń balalardy býllıngten qorǵaý boıynsha jumysty kúsheıtýi qajet ekenin aıtty.
