Ulytaý oblysynda máslıhat saılaýyna 201 kandıdat tirkeldi
ULYTAÝ. KAZINFORM — Ulytaý oblysynda máslıhat depýtattyǵyna úmitkerlerdiń sany 200-den asty. Depýtattyq mandat úshin túrli saıası kúshterdiń ókilderi men ózin-ózi usynǵan azamattar baq synamaq. Óńirde saılaý komıssııalarynyń quramy jasaqtalyp, daýys berýge qatysatyn turǵyndardyń sany da naqtylandy.
Aldaǵy saılaý naýqanyna barlyǵy 203 komıssııa jumyldyrylady. Onyń ishinde alty aýmaqtyq, 70 okrýgtik jáne 127 ýchaskelik saılaý komıssııasy bar. Turaqty tirkelgen mekenjaıynan tys jerde bolatyn azamattardyń daýys berýine de jaǵdaı jasalǵan. Mundaı saılaýshylar úshin Jezqazǵanda eki, Sátbaevta eki saılaý ýchaskesi ashylady.
Saılaý komıssııalarynyń quramynda barlyǵy 1 203 adam jumys isteıdi. Olardyń 811-i ýchaskelik, 350-i okrýgtik, 42-si aýmaqtyq komıssııalardyń múshesi. Óńirlik saılaý komıssııasynyń málimetinshe, komıssııa músheleriniń 93,2 paıyzynyń bul salada tájirıbesi bar. Barlyq komıssııa tolyq jasaqtalǵan.
Sońǵy málimet boıynsha, Ulytaý oblysynda 137 652 saılaýshy tirkelgen. Daýys berýshilerdiń basym bóligi Jezqazǵanda turady. Munda olardyń sany — 59 106 adam. Sátbaev qalasynda 42 962 saılaýshy bar. Al Jańaarqa aýdanynda — 18 648, Qarajal qalasynda — 10 461, Ulytaý aýdanynda 6 475 adam daýys berý quqyǵyna ıe.
Depýtattyq mandatqa úmitkerlerdiń qatary da belgili boldy. Birmandattyq saılaý okrýgteri boıynsha barlyq deńgeıdegi máslıhattarǵa 201 kandıdat tirkelgen. Onyń 41-i oblystyq máslıhattan, 94-i qalalyq, 66-sy aýdandyq máslıhattan depýtat bolýǵa nıetti.
Alaıda bastapqyda saılaýǵa qatysýǵa nıet bildirgenderdiń barlyǵy birdeı tirkeýden ótken joq. Kandıdattar usyný kezeńinen keıin 38 adam óz kandıdatýrasyn qaıtaryp alǵan. Taǵy eki úmitker saılaý jarnasyn tólemegendikten tirkeýden óte almady.
Oblystyq máslıhat depýtattyǵyna tórt saıası partııa da óz kandıdattaryn usyndy. Olar — «Aq jol», «Aýyl», «Ádilet» jáne Respublica. Partııalyq tizimge barlyǵy 37 adam engizilgen. Eń kóp kandıdatty «Ádilet» partııasy usyndy — 21 adam. «Aýyl» partııasynan segiz, al «Aq jol» men Respublica partııalarynan tórt-tórt úmitker tirkelgen.
Partııalyq tizimderdi jasaqtaý kezinde áıelder men jastardyń jıyntyq ókildigine qatysty talap saqtalǵan.
Buǵan deıin Qaraǵandy oblysynda máslıhat saılaýyna 600-den astam kandıdat tirkelgenin habarlaǵan bolatynbyz.
