Ulytaý oblysynda mas kúıde kólik basqarǵan 15 adam jaýapqa tartyldy
JEZQAZǴAN. KAZINFORM — Jyldyń basynan beri Ulytaý oblysynda mas kúıde kólik basqarǵany jáne buryn júrgizý quqyǵynan aıyrylǵanyna qaramastan qaıta kólik tizgindegeni úshin 15 adam qylmystyq jaýapkershilikke tartyldy. Sot bul áreketterdiń qoǵamdyq qaýiptiligin eskere otyryp, kinálilerdi bas bostandyǵynan aıyryp, ómir boıyna kólik júrgizý quqyǵynan aıyrdy. Bul týraly oblystyq prokýratýra málim etti.
Prokýratýranyń málimetinshe, barlyq tulǵalar quqyq buzýshylyq jasaý sátinde ustalyp, ýaqytsha ustaý ızolıatoryna qamalǵan.
— Aımaq sottary jasalǵan qylmystyq quqyqbuzýshylyqtardyń aýyrlyǵyn jáne olardyń joǵary qoǵamdyq qaýiptiligin eskere otyryp, kináli tulǵalarǵa ómir boıyna kólik júrgizý quqyǵynan aıyra otyryp, bas bostandyǵynan aıyrý túrindegi aıyptaý úkimderin shyǵarǵan, — delingen habarlamada.
Mysaly, buryn kólik quralyn basqarý quqyǵynan 7 jyl merzimge aıyrylǵan tulǵa tıisti qorytyndy jasamaı 2025 jylǵy 16 tamyzda Sátbaev qalasynda «Mercedes-Benz» markaly kólikti alkogoldik masań kúıde qaıta basqarǵan. Sátbaev qalalyq sotynyń úkimimen ol kináli dep tanylyp, 1 jyl 6 aı merzimge bas bostandyǵynan aıyrý jáne ómir boıyna kólik júrgizý quqyǵynan aıyrý jazasy taǵaıyndalǵan.
Qadaǵalaýshy organ masań kúıdegi júrgizýshilerdiń qatysýymen bolatyn qylmystyq quqyq buzýshylyqtardyń aldyn alý jónindegi úılestirý jumystaryn jalǵastyrady.
Ulytaý oblysynyń prokýratýrasy kólikti masań kúıde basqarǵany úshin qylmystyq jaýaptylyq qarastyrylǵanyn ári bas bostandyǵynan aıyrý men júrgizýshi kýáliginen ómir boıyna aıyrý jazasy qoldanylatynyn eskertti.
Aıta keteıik, buǵan deıin Jezqazǵanda mas kúıde kólik tizgindegen turǵyn sot sheshimimen 1 aıǵa qamalǵanyn jazǵan edik.