Ulytaý oblysynda mal jaıý erejelerin buzǵan 232 adam jaýapkershilikke tartyldy

JEZQAZǴAN. KAZINFORM – Ulytaý oblysynda prokýratýra men jergilikti atqarýshy organdardyń birlesken jumysy nátıjesinde jol-kólik oqıǵalarynyń sany edáýir azaıdy. Bıyl malǵa soqtyǵysý faktileri ótken jylmen salystyrǵanda 67 paıyzǵa tómendedi.

Oblys dástúrli túrde mal sharýashylyǵy jaqsy damyǵan óńirlerdiń biri sanalady. Alaıda aýyl sharýashylyǵy janýarlarynyń avtojol boıynda baqylaýsyz júrýi kólik qozǵalysy qaýipsizdigine eleýli qaýip tóndiredi.

Osyǵan baılanysty Ulytaý oblysynyń prokýratýrasy tıisti memlekettik organdarmen birlesip, maldyń jolǵa shyǵýynyń aldyn alýǵa baǵyttalǵan jol kartasyn júzege asyrýda.

- Atqarylǵan profılaktıkalyq sharalar aıasynda mal jaıý erejelerin buzǵan 232 adam ákimshilik jaýapkershilikke tartyldy.

Prokýratýra qabyldaǵan sharalardyń nátıjesinde óńirde malǵa soǵý derekteri 67 paıyzǵa qysqardy. Bul kórsetkish quqyq qorǵaý jáne jergilikti bılik organdarynyń ózara is-qımylynyń tıimdiligin dáleldeıdi, - delingen aqparatta.

Vedomstvo ókilderi aldaǵy ýaqytta da osy baǵyttaǵy jumysty jalǵastyryp, jol-kólik oqıǵalarynyń aldyn alý, azamattardyń qaýipsizdigin jáne olardyń múlkin saqtaý máselelerine erekshe nazar aýdaratynyn málimdedi.

Aıta keteıik, Bıyl Ulytaý oblysy aýmaǵynda mal urlyǵy 30%-ǵa tómendegen.