Ulytaý oblysynda qutqarýshylar er adamdy órtten qutqaryp, jarylystyń aldyn aldy
ASTANA. KAZINFORM - Ulytaý oblysynda qutqarýshylar janyp jatqan úıden er adamdy qutqaryp, yqtımal jarylystyń aldyn aldy, dep habarlaıdy QR Tótenshe jaǵdaılar mınıstrliginiń baspasóz qyzmeti.
Baspasóz qyzmetiniń málimetterine qaraǵanda, Qarajal qalasyndaǵy Shaıhına kóshesinde ornalasqan turǵyn úıden órt shyqty. TJM qutqarýshylarynyń jedel áreketiniń nátıjesinde 1971 jyly týǵan er adam qutqarylyp, tútinge ýlaný belgilerimen aýrýhanaǵa jetkizildi.
Sondaı-aq TJM qyzmetkerleri úıden kólemi 27 lıtr bolatyn 6 gaz ballonyn alyp shyǵyp, jarylys qaýpiniń aldyn aldy. Órt 10 sharshy metr aýmaqta sóndirildi. Órttiń shyǵý sebebi anyqtalyp jatyr.
Osyǵan deıin Astana sý qoımasynda kúshti jel alyp ketken 2 serfıngshi qutqarýshylardy shaqyrýǵa májbúr bolǵany týraly jazdyq.
