Ulytaý oblysynda qumar oıynǵa qunyqqan memlekettik qyzmetshi jumysynan bosatyldy
JEZQAZǴAN. KAZINFORM - Bul týraly Ulytaý oblysy prokýratýrasynyń bapasóz qyzmetinen málim boldy.
Baspasóz qyzmetiniń habarlaýynsha, Qazaqstan Respýblıkasynyń «Sybaılas jemqorlyqqa qarsy is-qımyl týraly» Zańyna sáıkes, memlekettik qyzmetshilerge telekommýnıkatsııalyq jeliler men ınternetti paıdalana otyryp ótkiziletin qumar oıyndaryna jáne bás tigýge qatysýǵa tyıym salynǵan.
Taldaý nátıjesinde Sátbaev qalasy ákimdiginiń bas mamany atalǵan talaptardy júıeli túrde buzǵany anyqtaldy.
«1XBET» jáne «OLIMPBET» býkmekerlik keńseleriniń resmı málimetterine sáıkes, ol jalpy somasy 16 mıllıon teńgege jýyq mólsherde qumar oıyndaryna qatysqan.
Prokýrorlyq qadaǵalaý aktisin qaraý nátıjesi boıynsha memlekettik qyzmetshi qyzmetinen bosatyldy.
Osyǵan deıin Oralda qumar oıyn oınaǵan 16 sheneýnik jumystan shyǵarylǵany týraly jazdyq.