Ulytaý oblysynda kúkirt qyshqyly tsehy salynady
JEZQAZǴAN. KAZINFORM — Búgin «Qazaqmys» korporatsııasy men sheteldik China National Chemical Engineering (CNCEC) kompanııasy Jezqazǵan mys balqytý zaýytynda jańa kúkirt qyshqyly tsehyn salý týraly memorandýmǵa qol qoıdy, dep habarlaıdy oblystyq ákimdiktiń baspasóz qyzmeti.
Mańyzdy qujatqa qol qoıý rásimine Ulytaý oblysynyń ákimi Eset Baıken, «Qazaqmys» korporatsııasy» JShS Basqarma tóraǵasy Rýslan Óskenáli jáne CNCEC Dırektorlar keńesiniń tóraǵasy Bao Gýandýn qatysty.
Investıtsııalyq jobanyń jalpy quny 213,76 mln AQSh dollaryn quraıdy. Jobany iske asyrý kásiporyndy ekologııalyq jáne tehnologııalyq jańǵyrtýdyń mańyzdy kezeńderiniń birine aınalyp, Jezqazǵan qalasyna túsetin ekologııalyq júktemeni edáýir tómendetýge múmkindik beredi.
— Bul — Jezqazǵandaǵy ekologııalyq jaǵdaıdy jaqsartýǵa, shyǵaryndylardy azaıtýǵa jáne óńirdiń óndiristik áleýetin nyǵaıtýǵa baǵyttalǵan aýqymdy joba. Joba Úkimettiń qoldaýymen Memleket basshysy Qasym-Jomart Kemeluly Toqaevtyń Ulytaý óńirin damytý jónindegi tapsyrmalaryn iske asyrý aıasynda júzege asyrylyp jatyr, — dedi Ulytaý oblysynyń ákimi Eset Baıken.
Joba jańa kúkirt qyshqyly óndirisin salýmen qatar, tehnologııalyq gazdardy ustaý jáne tazartý júıesin jańǵyrtýdy kózdeıdi. Jańa júıe tehnologııalyq protsesterdi avtomattandyrý men baqylaýdyń zamanaýı quraldarymen jabdyqtalady.
Joba iske asyrylǵannan keıin tehnologııalyq gazdardy ustaý deńgeıi 99%-ǵa deıin jetedi. Bul óndiris shyǵaryndylaryn aıtarlyqtaı azaıtyp, qorshaǵan ortaǵa túsetin áserdi tómendetýge múmkindik beredi.
Nysandy paıdalanýǵa berý 2028 jylǵa josparlanyp otyr.
