Ulytaý oblysynda qolda bar mal men ákimdiktiń statıstıkasy bir-birine sáıkespeıdi

JEZQAZǴAN. KAZINFORM — Ulttyq statbıýro Ulytaý oblysynda profılaktıkalyq baqylaý barysynda mal basy boıynsha usynylatyn ákimshilik derekterdiń naqty kórsetkishpen sáıkessizdigin anyqtady. 

Úı sharýashylyqtaryn aralaý kezinde bıýro qyzmetkerleri kórsetkishterdi asyra kórsetý/tómendetý faktilerin tirkedi. 

Búgingi tańda mal basynyń derekteri sharýashylyq esepteriniń ákimshilik derekteri jáne «Mal basyn birdeılendirý» aqparattyq júıesi negizinde qalyptastyrylady.

«Profılaktıkalyq baqylaý aıasynda Qarsaqpaı jáne Keńgir eldimekenderindegi 25 sharýashylyqty araladyq. Aldyn alý sharalarynyń nátıjesinde Qazaqstannyń memlekettik statıstıka salasyndaǵy zańnama buzýshylyqtary anyqtaldy. Mysaly, Qarsaqpaı aýylynda iri qara mal basynyń sany sharýashylyq esep pen naqty derekterdi salystyrǵanda — 35%, Keńgir aýylynda jylqy sany boıynsha — 22% sáıkespeıdi», — dedi bıýronyń derekter bazasynyń sapasyn baqylaý bóliminiń basshysy Nıkıta Býrmıstrov.

Ol profılaktıkalyq baqylaý is-sharalarynyń qorytyndysy boıynsha ákimderge naqty derekter men sharýashylyq esepte usynylǵan ákimshilik derekter arasyndaǵy sáıkessizdikterden týyndaǵan buzýshylyqtardy joıý jóninde uıǵarym shyǵarylǵanyn atap ótti.

Bıýro mamandary Ulytaý óńirine sapary barysynda jergilikti atqarýshy organdarmen arnaıy semınar ótkizip, onda ákimshilik derekterdi jınaý máselelerin talqylap, memlekettik statıstıka salasyndaǵy zańnamany túsindirdi jáne «Aýyl sharýashylyǵy janýarlaryn birdeılendirý» taqyrybyndaǵy ınteraktıvti baqylaý taqtasynyń múmkindikterin kórsetti. 

Aıta keteıik, mundaı profılaktıkalyq is-sharalar Túrkistan, Mańǵystaý, Aqmola jáne Qaraǵandy oblystarynda jáne Ulytaý oblysynyń taǵy alty aýyldyq okrýginde júrgiziledi.