Ulytaý oblysynda Qazaqstandaǵy eń iri shahmat akademııasy ashyldy
JEZQAZǴAN. KAZINFORM - Jezqazǵanda áıgili shahmatshy Jansaıa Ábdýmáliktiń shahmat akademııasynyń jańa fılıaly ashyldy.
Jezqazǵanda «Qazaqmys Korporatsııasy» JShS qoldaýymen áıgili shahmatshy, álemniń bes dúrkin chempıony Jansaıa Ábdýmáliktiń shahmat akademııasynyń jańa fılıaly ashyldy.
Qazaqstan Respýblıkasynyń Týrızm jáne sport mınıstri Erbol Myrzabosynov arnaıy kelip, akademııany saltanatty túrde ashty. Bul — sharanyń mańyzdylyǵyn aıqyndatty.
Ortalyq — elimizdegi eń iri shahmat akademııasy bolyp sanalady. Munda Ulytaý oblysynyń 5 pen 18 jas aralyǵyndaǵy 1000-ǵa jýyq bala shahmat ónerin meńgermek.
Ashylý saltanatynda Ulytaý oblysynyń ákimi Dastan Ryspekov óńirimizden tanymal shahmatshylar men el chempıondary shyǵyp, Ulytaý oblysyn tek respýblıkalyq deńgeıde ǵana emes, álemdik arenada da tanystyratynyna senim bildirdi.
900 sharshy metr aýmaqty qamtıtyn jańa fılıalda oqýshylar úshin barlyq qajetti jaǵdaılar jasalǵan. Zamanaýı jabdyqtarmen qamtamasyz etilgen oqý ortalyǵy bolashaq chempıondarǵa sapaly bilim alýǵa múmkindik beredi.
Sonymen qatar, akademııanyń ashylýy aıasynda «KAZAKHMYS YOUTH TEAM CHESS CUP» atty alǵashqy halyqaralyq balalar komandalyq týrnıri uıymdastyryldy.
Bul jarysqa Qazaqstan, Reseı, Belarýs, Qyrǵyzstan jáne Mońǵolııadan kelgen 100-den astam jas shahmatshy qatysty.
Eske salsaq, budan buryn Ulytaý oblysynda shahtadaǵy jumysshynyń ólimi boıynsha qylmystyq is qozǵalǵanyn jazdyq.