Ulytaý oblysynda qaıtarylǵan aktıvter esebinen jańa medıtsınalyq jáne sý nysandary ashyldy
ASTANA. KAZINFORM – Ulytaý oblysynda memleketke qaıtarylǵan zańsyz ıemdenilgen aktıvter esebinen áleýmettik ınfraqurylymdy damytýǵa 10 mlrd teńgeden astam qarajat bólindi, dep habarlaıdy prokýratýra.
Qaıtarylǵan qarajat Arnaýly memlekettik qorǵa jınaqtalyp, áleýmettik mańyzy bar jobalardy iske asyrýǵa baǵyttalýda.
Búginde Jezqazǵan qalasynda, Jańaarqa jáne Ulytaý aýdandarynda tórt dárigerlik ambýlatorııa paıdalanýǵa berildi. Sonyń nátıjesinde 4,5 myńnan astam turǵyn sapaly medıtsınalyq kómekke qol jetkizdi.
Jańaarqa aýdanynyń Aınabulaq kenti men Ulytaý aýdanynyń Qorǵasyn aýylynda jańa medıtsınalyq pýnktterdiń ashylýy turǵyndar úshin mańyzdy oqıǵa boldy. Buǵan deıin olar medıtsınalyq kómek alý úshin aýdan ortalyqtaryna deıin 90 shaqyrym jol júrýge májbúr bolǵan.
«Sonymen qatar úsh sýmen jabdyqtaý nysanynyń qurylysy aıaqtaldy. Nátıjesinde Jańaarqa aýdanynyń aýyldarynda turatyn myńǵa jýyq turǵyn alǵash ret ortalyqtandyrylǵan aýyzsýmen qamtamasyz etildi», – dep habarlady prokýratýra.
Qazirgi ýaqytta óńirde taǵy eki joba júzege asyrylyp jatyr. Sonyń biri – quny 1,4 mlrd teńgeni quraıtyn Jańaarqa aýdandyq kópbeıindi ortalyq aýrýhanasyn kúrdeli jóndeý. Aýrýhanaǵa sońǵy ret kúrdeli jóndeý jumystary 10 jyl buryn júrgizilgen.
«Qaıtarylǵan aktıvter búginde oblys turǵyndarynyń ómir súrý sapasyn arttyratyn áleýmettik nysandarǵa aınalýda. Barlyq nysandardyń qurylysy men bólingen qarajattyń maqsatty paıdalanylýy oblys prokýratýrasynyń turaqty baqylaýynda», – delingen habarlamada.
Aıta keteıik, Aqmola oblysynda sý ınfraqurylymyn jańǵyrtýǵa qaıtarylǵan aktıvterden 1,4 mlrd teńge bólindi.
