Ulytaý oblysynda Qaırat Baıbosynovtyń 75 jyldyq mereıtoıy toılandy
JEZQAZǴAN. KAZINFORM – Qazaqtyń birtýar bulbul ánshisi, dástúrli án óneriniń darabozy, Qazaqstannyń halyq artısi Qaırat Áýkenuly Baıbosynovtyń 75 jyldyq mereıtoıy dara tulǵanyń týǵan jeri – Jańaarqa aýdanynda joǵary deńgeıde atalyp ótti.
Áserli sátterge toly mereıli shara qonaqtardy qurmetpen qarsy alýdan bastalyp, ári qaraı aýdandyq Mádenıet úıinde ótken «Qazaqtyń Qaıraty» atty taǵylymdy keshke ulasty. Kesh barysynda án óneriniń abyzy atanǵan tulǵanyń shyǵarmashylyq joly men ónegeli ómiri keńinen nasıhattalyp, sahna tórinde shákirtter men óner juldyzdary ustazǵa degen shynaıy yqylasyn ánmen órnektedi.
Mereıtoı ıesin quttyqtap, mereıin ústem etýge Ulytaý oblysynyń mádenıet, tilderdi damytý jáne arhıv isi basqarmasynyń basshysy Maǵjan Tabyldın, sondaı-aq Jezqazǵan qalasynyń ákimi Qaırat Shaıjanov arnaıy kelip, jyly lebizderi men aq tilekterin jetkizdi. Sondaı-aq kesh barysynda Jańaarqa aýdanynyń ákimi Qanat Qojyqaev halyq ártisine aýdan atynan Qurmet gramotasyn tabys etip, syı-sııapat kórsetti.
Óner keshinde Qaırat Áýkenulynyń shákirtteri men dástúrli ándi dáriptep júrgen elimizdiń tanymal ónerpazdary — Ǵalym Muhamedın, Serik Ospanov, Erkin Shúkiman, Aıtbek Nyǵyzbaev, Aıgúl Qosanova, Jaqsykeldi Kemalov, Serjan Musaınov, Ardaq Isataeva, Erjan Bazarbekov, Syrym Muhamedjanov jáne ózge de óner ıeleri halyq ániniń jaýharlaryn oryndap, kórermenge rýhanı lázzat syılady. Sharany jańaarqalyq Aıtýǵan Yrysaldy júrgizdi.
Sondaı-aq keshke zııaly qaýym ókilderi men óner janashyrlary arnaıy shaqyryldy. Astana qalasynan — Májilis depýtaty, Qazaqstannyń eńbek sińirgen qaıratkeri Amanjol Áltaı, aqyn, Memlekettik syılyqtyń laýreaty Ǵalym Jaılybaı, ánshi, jyrshy, qoǵam qaıratkeri Bekbolat Tileýhan, sondaı-aq qoǵam qaıratkerleri men metsenattar Jaısań Ahmetov, Azamat Ahmetov, Qanat Ahmetov, óner ıesiniń inisi Ahat Baıbosynov pen onyń jubaıy Roza Baıbosynova, uly Muhtar Baıbosynov jáne ánshi, Qazaqstannyń eńbek sińirgen ártisi Bereke Kóshenov, dástúrli ánshi Qaırat Ábeýov, «Taıjan Qalmaǵambetov atyndaǵy Ulytaý oblystyq fılarmonııasy» dırektory Qaragóz Abdýlsharıpqyzy qatysty.
Kesh sońynda shákirtteri men Jańaarqa jurtshylyǵy atynan Qaırat Áýkenulyna avtokólik kilti tabys etildi. Bul – eliniń óz ardaqty ulyna degen shynaıy yqylasy men zor qurmetiniń kórinisi boldy.
Qaırat Baıbosynov – tek Jańaarqanyń ǵana emes, barsha qazaq halqynyń maqtanyshy. Ol ulttyq ónerdiń qara shańyraǵyn kóterip, qazaq án mektebin álemge tanytqan dara tulǵa.
Mereıtoı ıesine arnalǵan kesh ónerdiń ólmes rýhy men ustazǵa degen urpaq alǵysynyń saltanaty ispetti áser qaldyrdy.