Ulytaý oblysynda ekonomıkalyq jáne áleýmettik damý josparlary pysyqtaldy
JEZQAZǴAN. KAZINFORM — Búgin Ulytaý oblysynyń ákimi Dastan Ryspekovtiń tóraǵalyǵymen Prezıdent Joldaýyn talqylaý boıynsha jıyn ótti.
Jıynda oblystyq máslıhattyń depýtaty Svetlana Jýmkına Joldaýda kóterilgen jeti basym baǵyttyń árqaısysy ýaqyt talaby men el bolashaǵy úshin mańyzdy sheshimder ekenin aıtty.
Kásipkerlik jáne ónerkásip basqarmasynyń basshysy Danııar Arynǵazın 2025 jyldyń 7 aıyndaǵy ınvestıtsııalyq ahýal men týrızm salasynyń damý kórsetkishterimen bólisti. Óńir ekonomıkasyna tartylǵan ınvestıtsııa kólemi 103,4 mlrd teńgege jetip, ótken jylmen salystyrǵanda 9%-ǵa ósken. 937 mlrd teńgeniń 22 iri jobasy júzege asyrylyp jatyr, olar 2 myńnan astam jańa jumys ornyn ashýǵa múmkindik beredi.
Oblystyq tsıfrlyq tehnologııalar basqarmasynyń basshysy Ermek Jazylhanuly jasandy ıntellekt pen tsıfrlandyrý óńirdiń damýyna jańa serpin berip, memlekettik qyzmetterdiń sapasyn arttyratynyn atap ótti. Máselen, Jezqazǵan qalasynyń joldaryn tsıfrlandyrý jobasy shuńqyrlardy anyqtap, jol belgilerin ornatý boıynsha usynystar engizedi. VisionGuardAI beınemonıtorıng júıesi 11 áleýmettik nysanda ornatylyp, qaýipsizdikti qamtamasyz etedi. «109 biryńǵaı baılanys ortalyǵy» Mindia meta-platformasynyń kómegimen avtomattandyrylyp, ótinishter jyldam óńdeledi. «Protokol» júıesi keńes otyrystarynyń aýdıojazbalaryn mátinge aınaldyrady, al JI-aýdarmashy qujattardy qazaq jáne orys tilderine sapaly aýdarady. Ulytaý Habta Scout AI, DocGuard AI, Talapker AI jáne WorkClock sııaqty ınnovatsııalyq jobalar ázirlenip, qujat aınalymy, bilim jáne eńbek ónimdiligin arttyrý baǵytynda iske asyrylyp jatyr.
Oblystyq aýyl sharýashylyǵy jáne jer qatynastary basqarmasynyń basshysy Almat Saýhımov tsıfrlandyrý aıasynda jerdi berý tásilderi elektrondy formatqa kóshirilip, kosmomonıtorıng júıesi arqyly paıdalanylmaı jatqan jerler anyqtalyp, memleket menshigine qaıtarylyp jatqanyn aıtty.
Oblystyq týrızm gıdi Saǵdat Muhambetov Joshy han men Alasha hannyń mazarlary, Aqjar borly shatqaly, Bulanty shaıqasynyń tarıhı orny sııaqty kıeli jerlerdiń týrıstik kartanyń mańyzdy nysandaryna aınalatynyn jetkizdi.
Kezdesý qorytyndysy boıynsha, óńir basshysy Dastan Ryspekov Prezıdent Joldaýynda aıqyndalǵan basym baǵyttardy júzege asyrý maqsatynda naqty tapsyrmalar júktep, olardy sapaly jáne júıeli túrde júzege asyrý boıynsha óńirlik sharalar josparyn bekitýdi mindettedi.
