Ulytaý oblysynda eki jyldan beri veıp satyp kelgen turǵyn ustaldy

ASTANA. KAZINFORM – Qarjylyq monıtorıng agenttigi Ulytaý oblysy boıynsha departamenti elektrondy tutyný júıelerin (veıpterdi) zańsyz satý jáne tólem quralyna zańsyz qol jetkizý (dropperlik) deregi boıynsha sotqa deıingi tergep-tekserý júrgizip jatyr.

Vedomstvo málimetinshe, 2024 jyldan bastap Sátbaev qalasynyń turǵyny áleýmettik jeliler arqyly veıpterdi satýdy uıymdastyrǵan. Ónimdi ótkizý qashyqtan júzege asyrylyp, jetkizilim kýrer arqyly júrgizilgen.

Qylmystyq jolmen alynǵan kiristi zańdastyrý maqsatynda kúdikti «drop-shemany» paıdalanǵan. Atap aıtqanda, aqshalaı syıaqy úshin úshinshi tulǵa - dropperdiń atyna rásimdelgen banktik mobıldi qosymshaǵa qol jetkizgen.

Tintý júrgizý barysynda 500-den astam veıp tárkilendi.

Uıymdastyrýshyǵa qatysty bultartpaý sharasy retinde úıqamaq tańdaldy. Sondaı-aq sot sanktsııasymen onyń bank shottaryndaǵy 30,7 mln teńge kólemindegi aqshalaı qarajatqa tyıym salyndy.

QR Qylmystyq-protsestik kodeksiniń 201-babyna sáıkes ózge aqparat jarııa etýge jatpaıdy.

- Sonymen qatar 2025 jylǵy qyrkúıekten bastap QR Qylmystyq kodeksinde dropperlik úshin qylmystyq jaýapkershilik kózdelgen. Atap aıtqanda, banktik shotqa, tólem quralyna nemese sáıkestendirý quralyna zańsyz qol jetkizýdi berý, tapsyrý nemese alý, sondaı-aq úshinshi tulǵalardyń múddesine materıaldyq syıaqy úshin zańsyz tólemder men aqsha aýdarymdaryn júzege asyrý qylmystyq quqyq buzýshylyq bolyp sanalady.

Qylmystyń aýyrlyǵyna, áreketterdiń sıpatyna jáne alynǵan paıdanyń mólsherine baılanysty QR QK-niń 232-1-babyna sáıkes aıyppul salýdan bastap, múlkin tárkileı otyryp, 7 jylǵa deıin bas bostandyǵynan aıyrý jazasy kózdelgen, - dep jazdy vedomstvodan.

Aıta keteıik, Pavlodar oblysynda mektep oqýshylaryna veıp satqan top ustaldy.