Ulytaý oblysynda eki memlekettik mekemeniń basshysy sottaldy

JEZQAZǴAN. KAZINFORM — Jezqazǵan qalalyq soty Ulytaý oblysynyń Mádenıet, tilderdi damytý jáne arhıv isi basqarmasy men Tarıhı-mádenı murany saqtaý ortalyǵynyń basshylaryna qatysty paraqorlyq faktisi boıynsha úkim shyǵardy. Bul týraly Sybaılas jemqorlyqqa qarsy is-qımyl agenttiginiń baspasóz qyzmeti málimdedi.

Osylaısha, atalǵan laýazymdy tulǵalar oblys aýmaǵyndaǵy ejelgi qorymdardaǵy arheologııalyq qazbalar jónindegi jumystardy memlekettik satyp alý sharty boıynsha aktilerge qol qoıǵany jáne jalpy qamqorlyǵy úshin merdiger uıym ókilimen sóz baılasyp, 2 mln teńge kóleminde para alǵan.

Sot úkimimen osy memlekettik mekemelerdiń basshylaryna árqaısysyna 6 jyl bas bostandyǵynan aıyrý jazasy taǵaıyndaldy.

«Mádenı murany zertteý jáne saqtaý ortalyǵy» JShS merdiger kompanııasynyń ókiline 3,5 jylǵa bas bostandyǵynan aıyrý jazasy taǵaıyndaldy. Barlyq sottalǵandar ómir boıy memlekettik qyzmette qyzmet atqarý quqyǵynan aıyrylady. Jemqorlyqtyń aldyn alý, qoǵamda sybaılas jemqorlyqqa qarsy mádenıetti qalyptastyrý maqsatynda sot protsesi ashyq formatta ótkizildi. Protseske oblystyq Mádenıet, tilderdi damytý jáne arhıv isi basqarmasynyń qyzmetkerleri, sondaı-aq oblystyń, Jezqazǵan, Sátbaev, Qarajal qalalary, Jańaarqa jáne Ulytaý aýdandarynyń memlekettik qyzmetshileri onlaın rejımde qosyldy», - delingen habarlamada.

Úkim zańdy kúshine engen joq.