Ulytaý oblysynda Densaýlyq saqtaý mınıstrliginiń arnaıy jumys toby qurylady
ULYTAÝ. KAZINFORM — Ulytaýǵa jumys saparynyń ekinshi kúni Densaýlyq saqtaý mınıstri Aqmaral Álnazarova óńirdiń medıtsınalyq jurtshylyǵymen kezdesti.
Vedomstvo basshysy densaýlyq saqtaý salasyndaǵy zańnamadaǵy negizgi ózgerister týraly aıtty. Ol medıtsınalyq kómektiń biryńǵaı paketin engizýge, MÁMS sheńberinde tegin medıtsınalyq kómek pen qyzmetterdiń kepildik berilgen kólemin usynýdyń jańa tásilderine tolyǵyraq toqtaldy.
Medıtsınalyq kómektiń sapasyn baqylaý bóliginde mınıstr bıylǵy 15 qyrkúıekten bastap Medıtsınalyq jáne farmatsevtıkalyq baqylaý komıtetine qadaǵalaý fýnktsııalary beriletinin, bul kórsetiletin qyzmetterdiń qaýipsizdigin baqylaýdy kúsheıtýge múmkindik beretinin eske saldy.
Óńirde onkologııalyq qyzmetti damytý máselelerine erekshe nazar aýdaryldy. Mınıstr erte dıagnostıka, patsıentterdi ýaqtyly jiberý jáne joǵary tehnologııalyq kómektiń qoljetimdiligin qamtamasyz etý onkologııalyq aýrýlarmen kúreste negizgi faktorlar bolyp tabylatynyn atap ótti.
Medıtsına qyzmetkerleri kadr tapshylyǵy, medıtsınalyq kómekti uıymdastyrý jáne ınfraqurylymnyń jaı-kúıi taqyryptaryn kóterdi. Sondaı-aq, medıtsına qyzmetkerleriniń kásibı jaýapkershiligin saqtandyrý tetigi qyzyǵýshylyq týdyrdy, ol patsıentterdiń quqyqtaryn qorǵaýdy qamtamasyz etýi, dárigerler úshin zańdy qaýipterdi tómendetýi jáne daýly jaǵdaılardy sheshýge kómektesýi kerek.
Vedomstvo basshysy áriptesterine syndarly usynystary úshin alǵysyn bildirip, aıtylǵan barlyq másele aldaǵy jumysta eskeriletinin atap ótti.
Keńes qorytyndysy boıynsha mınıstr óńirde arnaıy jumys tobynyń qurylǵany týraly habarlady.
— Kelesi aptadan bastap Densaýlyq saqtaý mınıstrliginiń arnaıy jumys toby jumys isteı bastaıdy. Onyń mindeti — aǵymdaǵy jaǵdaıǵa egjeı-tegjeıli taldaý júrgizý, ınfraqurylymnyń jaı-kúıin baǵalaý, júıelik problemalardy anyqtaý jáne medıtsınalyq kómektiń sapasyn jaqsartý boıynsha naqty sharalar ázirleý, — dep túıindedi mınıstr.
Aıta ketelik Qazaqstanda qyzylsha juqtyrǵandardyń sany 11,5 ese azaıdy.