Ulytaý oblysynda búgin 30 otbasy qonys toıyn toılady
JEZQAZǴAN. KAZINFORM – Halyqaralyq otbasy kúnine oraı Sátbaev qalasynda baspana kezeginde turǵan azamattarǵa jańa turǵyn úıdiń kilti tabystaldy. Jalpy aýdany 2000 sharshy metrge jýyq bolatyn bes qabatty 30 páterli turǵyn úı el ıgiligine berildi.
Qonys ıelerin quttyqtaǵan Ulytaý oblysynyń ákimi Dastan Ryspekov óńirde halyqty jaıly baspanamen qamtamasyz etý baǵytyndaǵy jumystar júıeli túrde jalǵasyp jatqanyn atap ótti. Sondaı-aq turǵyn úı qurylysyna jergilikti bıýdjetpen qatar ınvestıtsııalyq múmkindikter de keńinen tartylyp jatqanyn jetkizdi.
— Oblysymyz qurylǵan ýaqyttan beri 365 myń sharshy metrge jýyq turǵyn úı paıdalanýǵa berildi. Al bıyl 100 myń sharshy metrge jýyq baspananyń qurylysy aıaqtalady dep kútilýde. Bul taǵy 800-den astam otbasynyń jańa qonysqa ıe bolýyna múmkindik beredi. Osyndaı aýqymdy jumystardyń nátıjesinde óńirimiz bıylǵy qańtar-naýryz aılaryndaǵy respýblıkalyq kórsetkish boıynsha qurylys kóleminiń ósimi jóninen kóshbasshylar qatarynan kórindi, — dedi óńir basshysy.
Jańa baspanaly bolǵan otbasylar qýanyshtaryn bólisip, kórsetilip jatqan qoldaý úshin rızashylyqtaryn bildirdi.
— Óz baspanamyz bolsa dep armandap kele jatqanymyzǵa osymen 16 jyl bolǵan. Óz aldymyzǵa oblys bolǵaly baspana kezegi jyljyp jatqanyn baıqap, úmittenip júretinbiz. Búgin mine, qol jetkizdik. Ákimdikke alǵys, — deıdi sátbaevtyq Jaýhar Ahmetova.
Aıta keteıik, sáýirdiń basynda Ulytaý oblysy ákimi men birqatar delegatsııa múshesi Qytaı Halyq Respýblıkasyna baryp, quny 12.5 mlrd teńgelik kelisimshartqa qol jetkizgen. Atalǵan ınvestıtsııalyq qarajat Jezqazǵan, Sátbaev, Qarajal qalalaryndaǵy turǵyn úı qoryn jańartý, apatty úılerdiń ornyna jańa baspanalar salýǵa baǵyttalyp otyr.
Jalpy alǵanda óńirde turǵyn úı qurylysynyń qarqyny jyl saıyn artyp keledi. Bul halyqtyń ál-aýqatyn jaqsartýǵa jáne áleýmettik máselelerdi kezeń-kezeńimen sheshýge baǵyttalǵan mańyzdy qadamdardyń biri.
