Ulytaý oblysynda bir kúnde tórt temirjol vokzaly ashyldy
JEZQAZǴAN. KAZINFORM — Búgin Ulytaý oblysynda tórt temirjol vokzaly jańǵyrtylyp, jolaýshylarǵa qaıta paıdalanýǵa berildi. Jańarǵan nysandar Jezqazǵan, Qarajal qalalarynda, Jańaarqa aýdanynda jáne Qyzyljar beketinde ornalasqan.
Bul jumystar Memleket basshysy Qasym-Jomart Kemeluly Toqaevtyń tapsyrmasyna sáıkes, Úkimettiń qoldaýymen elimizdegi 125 temirjol vokzalyn jańǵyrtý jobasy aıasynda, QR Kólik mınıstriligi, «Samuryq-Qazyna» AQ, «QTJ» UK» AQ, Ulytaý oblysynyń ákimdigimen birlesken jumystardyń nátıjesinde júzege asyryldy.
Jańǵyrtylǵan vokzaldar zamanaýı talaptarǵa saı jabdyqtalyp, jolaýshylarǵa qolaıly jaǵdaı jasaýǵa baǵyttalǵan.
Ulytaý oblysynyń ákimi Eset Baıken vokzaldardyń jańartylýy óńirdiń kólik ınfraqurylymyn damytýdaǵy mańyzdy qadam ekenin atap ótti.
— Memleket basshysynyń tapsyrmasymen salynyp jatqan «Qyzyljar–Moıynty» temirjol jelisi oblysymyzdyń damýyna tyń serpin berip qana qoımaı, elimizdiń tranzıttik áleýetin arttyratyny sózsiz. Jalpy, oblysymyzda kólik ınfraqurylymyn damytý baǵytynda aýqymdy jumystar atqarylýda. Temirjol qatynasyn jaqsartýmen qatar, avtomobıl joldarynyń sapasyn arttyrýǵa da basymdyq berilip jatyr. «Jezqazǵan–Qyzylorda» avtojolyndaǵy jumystar búginde 90 paıyzǵa oryndaldy. Jaqyn aılarda kólik qozǵalysyn ashý josparlanyp otyr. «Jezqazǵan–Qaraǵandy» baǵytynda bıyl jer tósemin salý jáne materıaldyq-tehnıkalyq qamtamasyz etý jumystaryn tolyq aıaqtaý kózdelgen. Sondaı-aq «Ulytaý–Arqalyq» jolynyń 89 shaqyrymdyq bóligin jóndeý jumystary qazan aıynda aıaqtalady, — dedi oblys ákimi.
Jezqazǵan temirjol vokzalynyń ǵımaraty 1941 jyly salynǵan. Sodan beri alǵash ret keshendi jańǵyrtýdan ótip otyr. Joba aıasynda vokzal ǵımaratynyń aýmaǵy 541 sharshy metrden 2 500 sharshy metrge deıin ulǵaıtyldy.
Jańartylǵan vokzal bir mezgilde 500-ge jýyq jolaýshyny qabyldap, táýligine 2 myńǵa jýyq azamatqa qyzmet kórsetýge múmkindik beredi.
Búginde Ulytaý oblysyn elimizdiń alty oblysymen baılanystyratyn temirjol baǵyttary boıynsha jolaýshylar poıyzdary qatynaıdy. Jańǵyrtylǵan vokzaldar óńir turǵyndary men qonaqtaryna jaıly ári qaýipsiz qyzmet kórsetýge múmkindik beredi.
