Ulytaý oblysynda bir kúnde 1 550 túp jasyl jelek egildi
JEZQAZǴAN. KAZINFORM – Ulytaý oblysynda Prezıdenttiń bastamasymen júzege asyrylyp jatqan «Taza Qazaqstan» ekologııalyq baǵdarlamasy aıasynda iri ekologııalyq naýqan ótti. Bul is-shara Memleket basshysy Qasym-Jomart Toqaevtyń qatysýymen ótken respýblıkalyq telekópirmen ushtasty.
Telekópirge Ulytaý oblysynyń ákimi Dastan Ryspekov Jezqazǵan qalasynyń ortalyǵynan tikeleı qosylyp, Qazaqstan halqy Assambleıasynyń óńirlik fılıaly ókilderi, jastar, memlekettik qyzmetkerler, volonterler, kásiporyn qyzmetkerleri jáne qoǵam belsendileri qatysty.
Tikeleı efır barysynda Memleket basshysy bul bastamanyń urpaq aldyndaǵy mańyzdylyǵyn atap ótti. Ol óz sózinde «Taza Qazaqstan», «Zań jáne tártip», «Adal azamat» qaǵıdattarynyń birtutas qundylyqtar júıesin quraıtynyn jáne qoǵamdyq ómirde ornyǵýy qajettigin jetkizdi. Sonymen qatar tanymal ári bedeldi azamattardy bul bastamalardy nasıhattaýǵa tartý qajettigin, al negizgi qozǵaýshy kúsh retinde jastardy atap kórsetti. Ekologııalyq mádenıetti erte jastan qalyptastyrý mańyzdy ekenin tilge tıek etti. Prezıdent «Taza Qazaqstan» baǵdarlamasynyń halyqtyń ómir sapasy men ál-aýqatyn arttyrýǵa baǵyttalǵan ulttyq ıdeıaǵa aınalýy tıis ekenin aıtty.
Telekópir aıaqtalǵan soń qatysýshylar aǵash otyrǵyzý aktsııasyna qatysty. Jezqazǵan qalasyndaǵy saıabaqqa 275 túp, al Joshy han tarıhı-mádenı kesheniniń aýmaǵyna 510 túp jas kóshet egildi. Oblys kóleminde bir kún ishinde jalpy 1 550 túp jasyl jelek otyrǵyzyldy.
Ulytaý oblysynda eldi mekenderdi kógaldandyrý, aýmaqtardy abattandyrý jáne ekologııalyq mádenıetti qalyptastyrý jumystary júıeli túrde júrgizilip keledi. Bıylǵy jyldyń basynan beri 7 senbilik uıymdastyrylyp, oǵan 20 myńnan astam adam, 1 551 ujym jáne 416 tehnıka jumyldyryldy.
Atalǵan is-sharalar barysynda 2 749,9 tonna qoqys shyǵarylyp, 700,7 gektar aýmaq tazartyldy. Sonymen qatar 10 894 túp aǵash egildi. Bul jumystar óńirdiń ekologııalyq ahýalyn jaqsartýǵa baǵyttalǵan.
