Ulytaý oblysynda bıyl 833 otbasy baspanaly bolady
JEZQAZǴAN. KAZINFORM – Ulytaý oblysynyń óńirlik kommýnıkatsııalar qyzmetinde Qurylys, sáýlet jáne qala qurylysy basqarmasynyń basshysy Rınat Almatov buqaralyq aqparat quraldary ókilderiniń qatysýymen brıfıng ótkizdi.
Brıfıng barysynda óńirdegi qurylys salasynyń damý qarqyny men aldaǵy josparlar tanystyryldy.
Rınat Almatov 2025 jyldyń qorytyndysy boıynsha oblysta 109,8 myń sharshy metr turǵyn úı paıdalanýǵa berilgenin aıtty.
– Bıyl barlyq qarjylandyrý kózderi esebinen 111,4 myń sharshy metr turǵyn úıdi iske qosý josparlanyp otyr, – dedi ol.
Qazirgi ýaqytta jeke ınvestıtsııalar esebinen jalpy aýdany 57,6 myń sharshy metr bolatyn 14 kommertsııalyq turǵyn úı salynyp jatyr. Onyń ishinde bıyl 36,1 myń sharshy metrdi quraıtyn 8 turǵyn úı paıdalanýǵa beriledi. Qalǵan 6 turǵyn úıdiń qurylysy 2027 jylǵa ótpeli bolmaq.
Jalpy alǵanda, 2026 jyly óńirde aýdany 73 myń sharshy metr bolatyn 14 turǵyn úıdiń qurylysy aıaqtalady.
Onyń ishinde 3 kredıttik, 3 jalǵa beriletin jáne 8 kommertsııalyq turǵyn úı bar.
– Bul 833 otbasynyń baspanaly bolýyna múmkindik beredi, – dedi Rınat Almatov.
Sonymen qatar 2024 jyldan bastap oblys ortalyǵynyń Batys aýdanyndaǵy jańa shaǵyn aýdandy ınjenerlik ınfraqurylymmen qamtý úshin magıstraldyq jelilerdiń qurylysy júrgizilýde.
Jobany aıaqtaý 2026 jylǵa josparlanǵan.
Bıyl óńirde áleýmettik nysandar boıynsha 11 joba júzege asyrylyp jatyr. Atap aıtqanda, Qarajal qalasynda jabyq hokkeı korty men kópfýnktsıonaldy ortalyqtyń qurylysy júrgizilýde.
Hokkeı korty men Ulytaý aýylyndaǵy jabyq júzý basseınin qyrkúıek aıynda paıdalanýǵa berý kózdelgen.
Al Qarajaldaǵy kópfýnktsıonaldy ortalyq jyl sońyna deıin ashylady.
Jezqazǵan qalasynda kýrsanttarǵa arnalǵan pavılony bar avtomattandyrylǵan avtodrom qurylysyn aıaqtaý úshin merdiger anyqtalyp, qajetti tehnıka jumyldyrylǵan.
Sonymen qatar Jezqazǵanda oqýshylar saraıynyń qurylysy tolyq aıaqtalyp, qazir abattandyrý jumystary júrgizilýde.
Ulytaý aýylynda bir aýysymda 100 adam qabyldaıtyn emhanasy bar 20 oryndyq aýyldyq aýrýhana salynyp jatyr.
Jobany 2026 jyldyń sońyna deıin aıaqtaý josparlanǵan.
Sátbaev qalasynda ındýstrııalyq parktiń ınjenerlik-kommýnıkatsııalyq ınfraqurylymynyń qurylysy bıyl mamyr aıynda aıaqtalady dep kútilýde.
Budan bólek, óńirde bıyl taǵy úsh jańa joba bastalǵan.
Olardyń qatarynda Jańaarqa aýdanyndaǵy 100 oryndyq ınklıýzııany qoldaý ortalyǵy, Sátbaev qalasyndaǵy «BM №7» KMM sport zaly jáne Aqseleý Seıdimbek atyndaǵy orta mekteptiń sport zalyn salý jobalary bar.
Aıta keteıik, Ulytaý oblysynda Jeńistiń 81 jyldyǵy keń kólemde toılandy.
