Ulytaý oblysynda bıyl 700 mln teńgege 100 joba qarjylandyryldy
JEZQAZǴAN. KAZINFORM – Ulytaý oblysy qurylǵaly beri aýyl sharýashylyǵy salasyna 8,5 mlrd teńge ınvestıtsııa tartylǵan. Al bıyldyń ózinde quıylǵan ınvestıtsııa kólemi - 2,5 mlrd. teńge.
Jalpy osy jyly Ulytaý aýdanynda 400 gektar alqapta sýarmaly daqyldar men kókónis ósirý, Jezqazǵan qalasynda 5 000 bastan asatyn qoı sharýashylyǵy fermasynyń qurylýy, Jezqazǵan qalasynda 500 gektar aýmaqta sýarý jabdyqtaryn qoldana otyryp, mal azyǵyn egý jobasy, Jańaarqa aýdanynda 367 gektar aýmaqta sýarý qurylǵylaryn qoldana otyryp, mal azyǵyn egý boıynsha 2 joba, Jańaarqa aýdanynda 12 900 basqa arnalǵan qoı otbasylyq fermasyn salý, Jańaarqa aýdanynda 7 800 basqa arnalǵan iri qara mal otbasylyq fermasyn qurý jobalary bastaý aldy.
Qazirgi tańda, oblys áleýmettik azyq-túlik taýarlarynyń 4 túri boıynsha, atap aıtar bolsaq, sıyr eti, birinshi sortty bıdaı uny jáne birinshi sortty unnan jasalǵan bıdaı nanymen ózin-ózi qamtamasyz etip otyr. Sonymen qatar, ınvestıtsııalyq jobalardyń iske asyrylý nátıjesinde taýyq jumyrtqasymen qamtamasyz etý 0-den 40%-ǵa jetip otyr.
Al kelesi jyly qosymsha taýyq eti jáne kartoppen ishinara qamtamasyz etý josparlanyp otyr.
2022 jyly oblys aýmaǵynda sýarmaly qurylǵylardy qoldanatyn egistik alqaptar bolmady, búgingi kúni bul kórsetkish 1,7 myń gektarǵa jetti, 2026 jyly 2,5 myń gektarǵa deıin jetkizý jospary tur.
Aıta keteıik, byltyr Jezqazǵan qalasynda jumyrtqa baǵytyndaǵy qus fabrıkasy jáne Jańaarqa aýdanynda mal sharýashylyǵy kesheni men mal soıý tsehy iske qosylǵan bolatyn.