Ulytaý oblysynda balalardyń paıdasyna 91 mln teńgeden astam alıment óndirildi
JEZQAZǴAN. KAZINFORM – Balalardyń alımentke degen quqyǵyn qamtamasyz etý - Ulytaý oblysy prokýratýrasynyń basym baǵyttarynyń biri.
Prokýratýranyń málimetinshe, aǵymdaǵy jyldyń 8 aıynyń qorytyndysy boıynsha birqatar naqty nátıjelerge qol jetkizildi. Balalardyń paıdasyna 91 mln teńgeden astam alıment óndirildi. Oryndaýshylyq is júrgizý barysynda zańbuzýshylyqtarǵa jol bergen 6 jeke sot oryndaýshy túrli jaýapkershilikke tartyldy.
- Alıment tóleýden jaltaryp júrgen azamattardy qylmystyq jáne ákimshilik jaýapkershilikke tartý jumysy da belsendi júrgizilýde. Atap aıtqanda, QR QK-niń 139-baby (balalardy asyraýǵa arnalǵan qarajatty tóleý jónindegi mindetterdi oryndamaý) boıynsha 22 qylmystyq is qozǵalyp, taǵy 34 boryshker ákimshilik jaýapqa tartylǵan.
Máselen, azamat S. eki jyl boıy jumyspen qamtý ortalyǵy arqyly usynylǵan jumysqa ornalasý múmkindikterin paıdalanbaǵan jáne alıment tóleýden jaltarǵan. Onyń qaryzy 5 mln teńgeden asqan. Sot sheshimimen ol kináli dep tanylyp, 1 jyl merzimge bostandyǵyn shekteý jazasy taǵaıyndaldy, - dep jazdy baqylaýshy organnan.
Sonymen qatar 5 boryshkerdiń avtokóligi aıyp turaǵyna qoıylyp, 10 adamnyń júrgizýshi kýálikterin paıdalaný quqyǵy ýaqytsha toqtatyldy.
Prokýratýra boryshkerlerdi anyqtaýda standarttan tys tásilder de qoldanǵan. Taldaý barysynda 22 boryshkerdiń býkmekerlik keńselerdiń saıttarynda tirkelgeni belgili boldy. Olardyń jalpy «stavkalary» 10,6 mln teńgeni, utystary 6,8 mln teńgeni quraǵan. Bul azamattarǵa qatysty shekteý sharalary qabyldanyp, onlaın-platformalarda qaıta tirkelý múmkindigine tyıym salyndy.
- Sondaı-aq prokýrorlyq tekserý sot oryndaýshylarynyń eseptik qujattarynda burmalaýshylyqtardy anyqtady. Olar jalpy qaryzǵa 233 mln teńge kólemindegi toqtatylǵan oryndaýshylyq óndiristerdi zańsyz engizgen. Nátıjesinde statıstıkalyq esep túzetilip, bereshek óteldi, - delingen aqparatta.
Ulytaý oblysynyń prokýratýrasy qabyldanǵan keshendi sharalar memleket tarapynan balalardyń quqyqtary men zańdy múddelerin qorǵaýǵa qatań ári prıntsıpti ustanym tanytyp otyrǵanyn atap ótti. Jumys alımenttik mindettemelerden jaltarý tájirıbesin tolyq joıýǵa deıin jalǵasady.
Aıta keteıik, Shymkentte alıment tólemeı júrgen 7 boryshkerdiń kóligi aıypturaqqa qoıyldy.