Ulytaý oblysynda balabaqsha býhgalteri 16 mln teńgeni jymqyryp qalǵan

ASTANA. KAZINFORM — Ulytaý oblysy Qarajal qalasynyń prokýratýrasy júrgizgen tekseris nátıjesinde Jáırem kentiniń «Baldyrǵan» balabaqshasynyń býhgalteri bıýdjet qarajatyn jymqyrǵany anyqtaldy. Bul týraly Ulytaý oblysynyń prokýratýrasynyń baspasóz qyzmeti habarlady.

Býhgalter qyzmetkerlerdiń esepshottaryna belgilengen jalaqy mólsherinen joǵary qarajatty negizsiz aýdarǵan.

— Negizsiz aýdarylǵan bıýdjet qarajatynyń jalpy somasy 15,9 mln teńge boldy, — delingen habarlamada.

Qarajal qalalyq sotynyń úkimimen býhgalterge Qylmystyq kodekstiń 189-baby 4-bóligi 2)tarmaǵy boıynsha 10 jyl merzimge uıymdar men kásiporyndardy qarjylandyrýǵa baılanysty býhgalterlik jáne ózge de qyzmetpen aınalysý quqyǵynan aıyra otyryp, 8 jyl merzimge bas bostandyǵynan shartty túrde aıyrý túrindegi jazasy taǵaıyndaldy. 

Aıta ketelik Mańǵystaý oblysynda balabaqsha dırektor men esepshi ata-analar tólegen aqshany ózderiniń jeke shottaryna aýdaryp alǵany týraly jazǵan edik.