Ulytaý oblysynda azyq-túlikti arzandatý úshin qandaı jumys atqarylyp jatyr

Ulytaý oblysynyń ákimi Berik Ábdiǵalıuly oblystaǵy azyq-túlik baǵasyn arzandatý jumystaryn aıtyp berdi, dep habarlaıdy Kazinform. 

«Oblystaǵy azyq-túlik baǵasy ákim bolyp kelgennen alǵashqy másele bolyp kóterildi. Bizdiń tipti kartoppen ózimizdi qamtamasyz etetin múmkindigimiz bar. Ázirge et pen nan ǵana ózimizden shyǵyp otyr. Unmen tolyq qamtı almaımyz, óıtkeni bizde 25-30 myń gektar ǵana egin bar. Sút, kartop, jýany da óndire alamyz, biraq onymen eshkim aınalyspaıdy», - dedi Berik Ábdiǵalıuly Jibek Joly telearnasyndaǵy «Ýáde» baǵdarlamasynda.

Sonymen birge, B.Ábdiǵalıuly oblysta sýarmaly jerler de joq ekenin, oǵan qajettilik bolmaǵanyn atap ótti.

«Sondyqtan bıyl jobalardy ázirlep, aldaǵy eki jylda tolyǵymen kartoppen qamtamasyz etý mindetin qoıyp otyrmyz. Taýyq eti, jumyrtqa óndirý jobasy da bastaldy, kelesi jyldyń ortasyna qaraı, 30 paıyz taýyq etimen óńirdi qamtýymyz kerek», - dedi oblys ákimi.

Buǵan deıin Berik Ábdiǵalıuly Ulytaý oblys retinde bólingeli qandaı jumystar atqarylyp jatqanyn baıandaǵan edi.