Ulytaý oblysynda aýmaǵy 900 gektardan asatyn iri agrokeshen boı kóterip jatyr
JEZQAZǴAN. KAZINFORM – Ulytaý oblysynyń Keńgir aýylynda «Kengir agro» kesheniniń qurylysy bastaldy. Atalǵan orynda sýarmaly eginshilik, mal bordaqylaý alańy, sút fermasy syndy iri jobalar júzege asady.
Bastama «Otbasylyq ferma» jobasynyń aıasynda qolǵa alynǵan. Maqsat – óńirde ishki ónim qoryn molaıtyp, ekonomıkany ártaraptandyrý jáne jańa jumys oryndaryn ashý.
Qazir keshen aýmaǵynda ákimshilik-sharýashylyq ǵımarat, jumyskerlerge arnalǵan jataqhana, ashana, mal bordaqylaý alańy, qora-jaılar men qoıma salynyp jatyr. Jalpy 901 gektar aýmaqtyń 500 gektary mal azyǵyn daıyndaý úshin paıdalanylady. Ol úshin tamshylatyp sýarý ádisi qoldanylady. Qazir qajetti qurylǵylar jetkizildi. 45 myń kýb sý kólemine arnalǵan qazanshuńqyr qazylyp jatyr.
Aıta keterligi, qurylys barysynda oblys aýmaǵynda óndiriletin materıaldar qoldanylyp jatyr.
– Bul – sońǵy otyz jyldyqta bizdiń óńirde bolmaǵan joba. Tamshylatyp sýarý ádisimen atalǵan aýmaqqa mal azyǵy, jem-shóp ósiriledi. Qajetti qordy daıyndaǵan soń 500-ge jýyq asyl tuqymdy iri qara sıyr ákelip, bordaqylanady. Nátıjesinde aldaǵy eki jylda ózimizdiń sút ónimderin daıyndaıtyn ferma paıda bolmaq, - dedi Aýyl sharýashylyǵy jáne jer qatynastary basqarmasynyń basshysy Almat Saýhımov.
«Otbasylyq ferma» – esh oblysta balamasy joq joba. Qazir onyń aıasynda Jańaarqa aýdanynyń Túgisken, Alǵabas, Aınabulaq, Orynbaı aýyldarynda da fermalardyń jumysyn júrgizý qarqyn aldy.
Aıta keteıik, Ulytaý oblysynyń Túgisken aýylynda jańa veterınarııalyq pýnkt ashyldy.
