Ulytaý oblysynda «Arqa arýy – 2026» respýblıkalyq baıqaýy ótti
JEZQAZǴAN. KAZINFORM - Jańaarqa aýdandyq mádenı-saýyq ortalyǵynda Aqmaral Áltaeva atyndaǵy respýblıkalyq «Arqa arýy – 2026» sulýlyq baıqaýy joǵary deńgeıde uıymdastyryldy. Qazaqstan Respýblıkasy Táýelsizdiginiń 35 jyldyǵyna oraı ótken baıqaýdyń maqsaty – ulttyq qundylyqtardy dáripteý, qazaq qyzdarynyń óneri men bilimin, mádenıeti men sulýlyǵyn nasıhattaý.
Baıqaýǵa elimizdiń túkpir-túkpirinen kelgen arýlar qatysyp, ózderiniń shyǵarmashylyq qabiletterin, sahna mádenıetin jáne ulttyq ónerge degen qurmetin kórsetti.
Sharaǵa Ulytaý oblysy ákiminiń orynbasary Baqytjan Jaılaýbaev, Jańaarqa aýdanynyń ákimi Qanat Qojyqaev, aýdandyq máslıhat tóraǵasy ıÝrjan Bekqojın, QR Parlamenti Májilisiniń depýtattary Amanjol Áltaı men Qazybek Álishev qatysty.
Sonymen qatar baıqaýdyń qurmetti qonaqtary men qazylar alqasynyń quramynda Qazaqstannyń eńbek sińirgen qaıratkerleri Qanat Aıtbaev pen Sveta Aıtbaeva, telejúrgizýshi ári kásipker Dınara Sátjan, aqyn Qalqaman Sarın, Qazaqstannyń eńbek sińirgen qaıratkeri, «Qurmet» ordeniniń ıegeri Serjan Musaıyn, kásipker Merýert Ybysheva boldy.
Sharaǵa Qazaqstannyń Eńbek Eri, Qazaqstannyń Halyq ártisi, Memlekettik syılyqtyń laýreaty Qaırat Baıbosynov, Qazaqstannyń Halyq ártisi Merýert Ótekesheva, aıtysker aqyndar Juldyz Qojabekova men Ómirjan Kópbosynov, Qazaqstannyń eńbek sińirgen ártisi Serik Ospanov, kásipkerler ári metsenattar Meıram Aıdabolov pen Almaz Jaqaev, sondaı-aq Amandos Muqanov, Aıgúl Muqanova, «Aıgúl» zergerlik salonynyń ıesi Aıgúl Muqanova, Qalqash Erjanov jáne basqa da qurmetti qonaqtar qatysty. Baıqaýdyń joǵary deńgeıde ótýine qoldaý bildirip, jeńimpazdar men qatysýshylardy marapattaý qoryn qalyptastyrýǵa úles qosqan azamattarǵa uıymdastyrýshylar erekshe alǵys bildirdi.
Sharanyń erekshe ári taǵylymdy sátteriniń biri – qazaq kıno óneriniń ańyzyna aınalǵan, «Qyz Jibek» fılmindegi Jibek beınesi arqyly halyqtyń súıispenshiligine bólengen Qazaqstannyń Halyq ártisi Merýert Ótekeshovany Jańaarqa jurtshylyǵynyń aıryqsha qurmetpen qarsy alýy boldy. Ulttyq dástúrge saı uıymdastyrylǵan qurmet rásiminde ardaqty óner ıesine aq boz at mingizilip, qazaq halqynyń yqylasy men syı-qurmeti kórsetildi. Bul kórinis kópshiliktiń erekshe yqylasyna bólenip, baıqaýdyń mazmunyn tereńdete túsken áserli sátterdiń birine aınaldy.
Baıqaý qorytyndysy boıynsha Bas júldeni Astana qalasynyń arýy Tolǵanaı Naýryzbaı, І oryndy Qyzylorda oblysynyń ókili Baǵdat Baqyt, ІІ oryndy Atyraý oblysynyń qatysýshysy Indıra Muqtar, al ІІІ oryndy Ulytaý oblysynyń arýy Rahılıa Kýjına ıelendi.
Ulttyq rýhty ulyqtap, qazaq qyzynyń parasaty men kórkem bolmysyn dáriptegen taǵylymdy shara kórermenderdiń ystyq yqylasyna bólenip, elimizdiń mádenı ómirindegi mańyzdy jobalardyń birine aınaldy.
